Tunngaviusumik inatsit malillugu aalajangiisinnaassuseqarnerulerneq
Tunngaviusumik inatsit malillugu Kalaallit Nunaat aalajangiisinnaassuseqarnerulersinnaavoq - periuserlu tamanna pitsaalluinnassaaq. Inatsisilerituut marluk taama naliliipput.
Tunngaviusumik inatsit unitsitsisariaqanngilaq Kalaallit Nunaat nammineerluni aalajangiisinnaassuseqarnerorusuppat. Inatsisilerituut Per Vestergaard Pedersen aamma Christina Keis Nielsen, nunat tamalaat akornanni eqqartuussisuuneqarfimmi DLA Piperimeersut, taama naliliipput.
- Naalagaaffeqatigiinnerup tunngaviusumillu inatsip iluani namminersornerusumik ingerlatsisinnaanernik arlalinnik periarfissaqartoq uagut nalilerparput, nutaarsiassatut allakkiaminni allapput.
Namminersorlutik oqartussaanermi inatsimmi akisussaaffittut allanneqarsimasut saniatigut, Naalakkersuisut, danskit naalakkersuisui Folketingilu isumaqatigiissinnaappata, Kalaallit Nunaat suliassaqarfinnik allanik tigummisinnaasoq, taakku isumaqarput.
- Kalaallit Nunaanni Namminersorlutik Oqartussat suliassaqarfinnik allanik tigusisinnaanerannik killigititat piffissami aggersumi nikisinneqarnissaat naatsorsuutigineqartariaqartoq isumaqarpugut, taakku allapput.
Nammineq aalajangiisinnaatitaaneq killeqartoq
Naalagaaffeqatigiinnerup iluani suliassaqarfiit akisussaaffii arfinillit tiguneqarsinnaasut, nalilerneqarpoq:
- Kunngeqarfiup Danmarkip nunat naalagaaffiit allat tungaannut killiliussineq.
- Kunngeqarfiup Danmarkip nunami naalakkersuinikkut aaqqissuussineranut tunngasut.
- Illersornissamut sillimaniarnermullu tunngasut suliassaqarfiit ilaat.
- Danskisut innuttaassuseqarnermut tunngasut.
- Dronningip kunngilluunniit (kunngikkormiut) naalagaaffimmi qullersaasutut inissisimaneranut tunngasut.
- Danskit erfalasuat naalagaaffiillu allat ilisarnaataat.
Naalagaaffeqatigiinneq pillugu oqallinneq
Danskit oqallittartut politikerillu arlallit isummaminnik ukiuni kingullerni annissisarput, ilaatigut takorloorsinnaallugu naalagaaffeqatigiinnerup iluani nunat pingasuusut nammineernerullutik imminnullu atannginnerullutik suliaqarnerusinnaasut. Venstermeersoq Bertel Haarder Nauja Lyngep atuakkiaani, ‘Jeg er Nauja’-mi nittartakkatsinnilu Sermitsiaq.AG-mi oqaaseqartareerpoq naalagaaffeqatigiinnerup iluani nunat pingasuusut inuiaat assigiinngitsutut pingasutut isigineqarnissaat pingaaruteqarnerarlugu.
- Naalagaaffeqatigiinneq nunat pingasut, inuiaat pingasut ataatsimoorlutik suliassanik aaqqiissuteqarnissartik aalajangiussimagaat ersarissumik atuarneqarsinnaassaaq, Bertel Haarder isumaqarpoq. Taassuma naalagaaffeqatigiinneq tapersersortuarpaa. Isumaqarporlu tamanna pillugu nalunaarummik sanasoqassasoq. Nalunaarummi ilanngullugu ersersinneqassalluni, naalagaaffeqatigiinneq nammineq piumassutsimik tunngaveqartoq.
Diplomaati Peter Taksøe-Jensen forsvarsakademimilu pisortaasimasoq Niels Wang, isummat assigusut pillugit Martin Breumip atuakkiaani 'Hvis Grønland river sig løs'-imi, oqaaseqarput.
Per Vestergaard Pedersen aamma Christina Keis Nielsen isumaqarput, naalagaaffeqatigiinnerup iluani nammineernerulernissaq siullertut anguniarneqarsinnaasoq.
- Maannakkuugallartoq Kalaallit Nunaat naalagaaffeqatigiinnerup avataani nammineerluni naalagaaffittut inissisimalersinnaanngitsoq nalilerparput. Kalaallit Nunaat namminersulissappat naalagaaffeqatigiinniillu anissappat, taava Kalaallit Nunaat danskit naalagaaffiannit aningaasatigut taperneqarsinnaajunnaassaaq, soorlu naalagaaffiup ukiumoortumik tapianit.
- Kalaallit Nunaat siunissami nammineerluni naalagaaffinngorsinnaavoq. Maannakkuugallartumilli Kalaallit Nunaat naalagaaffiup avataani nammineerluni naalagaaffinngornissaminut qaqugu periarfissaqalissanersoq nalileruminaappoq.
Per Vestergaard Pedersen aamma Christina Keis Nielsen Naalakkersuisuni naalakkersuisoqarfiit ilaannik suliassaqarfiit ilaat pillugit siunnersuisarput. Nutaarsiassatulli allakkiaminni erseqqissarpaat nalilersuinertik kisiat aallaavigalugu, tamassumunngalu tunngatillugu Naalakkersuisut oqaloqatigineqarsimanngitsut.