Tunngaviusumik inatsissamik sulineq tukattoq Vittup nalilersorniarpaa

Namminiilivinnissamut naalakkersiuisoq, Vittus Qujaukitsoq, maanna isumalioqatigiisitami maannamut sulineq nalilersuleruttorlugu Sermitsiaq.AG-mut ilisimatitsivoq, ‘’tamannalu Inatsisartuni partiit tamarmik oqaloqatigalugit pissaaq’’.

Aggustiutinnagu paasinarsissasoq

Tunngaviusumik inatsisissamut isumalioqatigiissitap sulinerani suliassat nutaamik nassuiaasersorneqassappat?

- Isumalioqatigiissitap qanoq allanngorneqarnissaa pillugu juulip naanerani nalunaaruteqarnissara siunniuppara, Vittus Qujaukitsoq ataasinngornermi unnukkut mailikkut taama akissuteqarpoq.

Partiinut tamanut allakkamik nassiussisoqarsimasoq, taassuma oqaatigaa, aammalu isumalioqatigiisitap qanoq allanngortiginissaa paasinarsiumaartoq.

Partiit illuatungiliuttut marluk Demokraatit aamma Inuit Ataqatigiit naammaginninnginnertik ataasinngornermi KNR-imi oqariartuutigaat, tunngaviusumik inatsisissamik sulineq uninngaannarnerarlugu, tamatumalu saniatigut isumalioqatigiissitami sulinerup tunngavianik allannguinissamik ujartuipput.

Naammaginanngitsoq

Maannamut ingerlasimaneq naammaginanngitsoq, Vittus Qujaukitsoq marlunngornermi ullaakkut tusagassiuutinut nalunaarummi nassiunneqartumi naqissusiivoq.

Tunngaviusumik Inatsisissaq pillugu Isumalioqatigiissitaqsiuliani sulisimanerata uteqqinnginnissaa sapinngisamik anguniarpara. Taamaattumik Inatsisartuni Naalakkersuisunilu partiit oqaloqatigineranit suliassap tunngavia misissoqqinneqarpoq. Suliassap tunngavia ilusilersorneqassaaq nalornissutigineqannginnissaa qulakkeerneqarniassammat. Tamattami ilisimavarput ”tuaviuussat suliarinerlutaasartut”, taamaattumik suliassap tunngaviata Tunngaviusumik Inatsisissaq pillugu Isumalioqatigiissitami pitsaasuunissaa anguniarnerani piffissaqartitaarusuppunga, Naalakkersuisoq Vittus Qujaukitsoq taama oqaaseqarpoq.

Ajornartorsiutit pingasut iluarsisassat taassuma tikkuarpai:

• Isumalioqatigiissitap katitigaanera nalilersoqqinneqassaaq, naalakkersuisooqatigiinnissami isumaqatigiissummi partiit ilaasortaatitarerusutatik kiffaanngissuseqarlutik innersuussinissamut aalajangeerusukkamik.
• Kiffaanngissuseqarluni ilaasortassanik innersuussuteqarnermi qinigaanngitsunik toqqaasoqassappat qanoq iliornissamut piareersaatinik tekniskiusunik sanasoqassasoq, aammalu
• Tunngaviusumik Inatsisissaq pillugu Isumalioqatigiissitapsuut suliassarpiaanersut ersarissumik allassimasariaqarnersut ilanngutissagai, isumaliutissiissutigineqannginnerani innersuussutigineqannginneranilu.

Kikkut ilaasortaasinnaappat

Inuit Inatsisartunut ilaasortaanngitsut ilaasortanngorsinnaanerat ammaanniarneqarpa?

- Partiit namminneq isumalioqatigiissitami sinniisissatik toqqarsinnaasarnissaat siunniupparput, Vittus Qujaukitsoq Sermitsiaq.AG-mut akissuteqarpoq.

Taamaalilluni siulittaasuuffik, Vivian Motzfeldtip siulittaasuuffigisimasaa inuttassarsiorneqassaaq. Vivian Motzfeldt Naalakkersuisunut nutaanut ilaasortanngornikuugami siulittaasuuginnarnissaminut periarfissaaruppoq.

Suliassap ingerlanneqarnera

Tunngaviusumik inatsisissamut isumalioqatigiissitamut partiit ilaasortatik namminneq innersuuttassagaa, suliassap ingerlanneqarnera pillugu Vittus Qujaukitsoq ilisimatitsivoq. Taamaattorli ilaasortat Inatsisartut ataatsimiititaliaannit ‘’Tunngaviusumik inatsisissatut isumalioqatigiisitaq pillugu ataatsimiititaliaq’’ tusarniaasoqarnerisa kingorna Naalakkersuisunit akuerineqaqqaassapput.

Vittus Qujaukitsup oqarnera naapertorlugu qinersinermi kingullermi partiit annersaat siulittaasumik toqqaasassaaq, partiillu annersaasa tulliat siulittaasup tullianik – tassa Siumut aamma Inuit Ataqatigiit.

Sulineq sivitsorneqassaaq

- Isumalioqatigiissitap ingerlaqqinnissaa Inatsisartut aningaasanut inatsisaanni aningaasaliissutissat sinaakkutaannit aalajangerneqassaaq. Taamaattumillu piffissamik pilersaarut tamatuminnga aalajangerneqassalluni. Partii naalakkersuisoqatigiit sulinerup sivitsorneqarnissaa isumaqatigiissutigaat, Namminiilivinnissamut Naalakkersuisoq aaqqissuisoqarfimmut akissummini allappoq.