Tunngaviusumik inatsisissaq pillugu paasititsiniaasoqalerpoq
Tunngaviusumik inatsisissamut missingiutip suliarineqarnera ima siuarsimatigilereermat aalajangerneqarpoq tunngaviusumik inatsisit suunerannik inunnik qaammarsaallunilu paasisitsiniaanissaq ukiaq manna aallartisarneqassasoq
Meeqqat inuusuttuaqqallu tunngaviusumik inatsisissaq pillugu ilisimasaqarnerulissapput.
Tunngaviusumik inatsisissaq pillugu isumalioqatigiissitap siulittaasua Ineqi Kielsen ukiup affakkaartumik nutaarsiassatut allagaasa siullersaanni allappoq.
Suliniutaasami ilagaat videolianik naatsunik atortussiorneq. Taakku meeqqanut inuusuttuaqqanullu naatsorsuussaanerusussaapput taamatut ukiulinnut naleqqussakkanik imaqartussapput.
- Kiisalu isumalioqatigiissitat nittartagaat aamma Facebook-imi quppernerat pimoorullugu piorsarneqarput, ilisimatitsissutigineqarpoq.
Innuttaasut isumaat
Isumalioqatigiissitat sulinerat aammalu tunngaviusumik inatsisissamik suliaqarnermut tunngasut inuit qanoq isumaqarfigineraat aamma suliaralugu aallartinneqarpoq.
- Tassani sinerissami inuit nalaatsornikkut makitat sianerfigineqaqattaarfigineqaleruttorput. Naatsorsuutigaarput taamatut inunnik isumasiuinerup inernera oktoberip qiteqqusimalernerani avammut saqqummiunneqarumaartoq, ilisimatitsissutigineqarpoq.
Oqaasileriffimmi suleqateqarneq
Tunngaviusumik inatsisitaarnissaq siunnertaralugu isumalioqatigiissitami ilaasortat ukioq manna ataatsimiipput.
Suliaq ajornartorsiutitaqarsimanngitsoq ilisimatitsissutigineqarpoq.
- Tamatuma aqqutaani ajornartorsiutit taanngitsoorneq ajornartut ilagaat tunngaviusumik inatsisilerinermi taaguutit oqaatsillu kalaallisut tamaleraartumik atugaasarnerat. Taamaattumik suliassatsinnut ilaavoq taaguutinik oqaatsinillu ineriartortitsinissap sulissutigineqarnissaa.
Manna anguniarneqarpoq taamanikkussamut Kalaallit Nunaata naalagaaffiata tunngaviusumik inatsisaa atuutilerpat oqaatsit taaguutillu atorneqartussat pisortatigoortumik akuerineqarsimassasut.
- Tamanna pillugu Oqaasileriffik suleqatigalugu taaguusersuuserineq aamma maannangaaq ingerlapparput, Tunngaviusumik inatsisissaq pillugu isumalioqatigiissitaq allappoq.