Tunngaviusumik inatsisissaq pillugu isumalioqatigiissitaq: Siulittaasoq tunuarpoq
Naalakkersuisut Siulittaasuata Naalakkersuisoqarfia Tunngaviusumik inatsisissaq pillugu Isumalioqatigiissitap allattoqarfianit nalunaarfigineqarsimavoq, Kuupik V. Kleist Tunngaviusumik inatsisissaq pillugu Isumalioqatigiissitami siulittaasutut tunuarsimasoq pillugu.
Inuit Ataqatigiinni Naalakkersuisunilu siulittaasuusimasoq Tunngaviusumik inatsisissaq pillugu Isumalioqatigiissitami, namminersulivinnissamut aqqutissiuisuusussami siulittaasutut tunuarsimavoq.
Kuupik V. Kleistip Tunngaviusumik inatsisissaq pillugu Isumalioqatigiissitami siulittaasutut tunuarnissani nammineq aalajangersimavaa, Sermitsiaq.AG-mullu itisiliilluni oqaatigaa, nutaanik naalakkersuisooqatigiittoqalernera matumani pineqanngitsoq.
- Tunuarniarlunga aalajangerninnut nutaanik naalakkersuisooqatigiittoqalersimanera politikkiluunniit tunngaviunngillat. Tunngaviusumik inatsisissaq pillugu Isumalioqatigiissitami sulinerup unitsinneqarnissaanik Naalakkersuisut peqquneqarnissaat pillugut Inatsisartut aalajangiiffigisassaattut siunnersuut tusartinnagu itisiliillunga oqaaseqarnianngilanga, Kuupik V. Kleist Sermitsiaq.AG-mut oqarpoq.
Kuupik V. Kleistip tassunga atatillugu innersuussutigaa, Atassummiit siunnersuut Inatsisartuni ullumi oqaluuserineqartussaq. Partiimit isumalioqatigiissitap sulianerata unitsinneqarnissaa piumasarineqarsimavoq, partiimit isumaqartoqarmat aningaasat asuli atorneqartut. Siunnersuut siorna ukiakkkut siullermeerlugu suliarineqarpoq, partiinilli allanit taperserneqarani.
Kuupik V. Kleist ukiortaami isumalioqatigiissitami siulittaasunngorpoq, tassani Siumumeersoq Ineqi Kielsen taarserpaa, Ineqi Kielsen Tunngaviusumik inatsisissaq pillugu Isumalioqatigiissitami tamatuma kingorna siulittaasumut tullinngorpoq.
Tunngaviusumik inatsisissaq pillugu Isumalioqatigiissitami siulittaasussaq Inatsisartuni partiit annersaannit toqqarneqartarpoq.