Tunngaviusumik Inatsisissaq pillugu Isumalioqatigiissitaq ilisimasanik Islandimi pissarsisoq
Tunngaviusumik Inatsisissaq pillugu Isumalioqatigiissitami ilaasortat sisamat nunat tamalaat oqallittarfiannut Arctic Circlemut Islandimi ingerlanneqartumut peqataasimapput, tassani tunngaviusumik inatsisissamik piareersaanermut atatillugu ilisimasanik katersiniarlutik.
Nunat tamalaat oqallittarfiat Arctic Cicle sapaatip akunnerani kingullermi Islandimi ingerlanneqartoq, nunani issittuni naalakkersuisunit, suliffeqarfinnit, kattuffinnit universitetinillu 1.000-it sinnerlugit peqataasoqarpoq.
Peqataasunut ilaapput Tunngavusumik Inatsisissaq pillugu Isumalioqatigiissitami ilaasortat, tassaasut Sara Olsvig, Inuuteq Holm Olsen kiisalu Skúli Magnusson.
- Qaqquneqarsimanerput nuannaarutigeqaarput, aamma uagut sinnerluta peqataasoqarnera nuannaarutigaarput. Arctic Circle nunat tamalaat Issittup siunissaa pillugu suleqatigiinnermik oqaloqatigiinnermillu ukkataqartut nunarsuarmi attaveqaatit annersarimmassuk, periarfissaq atorluarlugu nunat allat tunngaviusumik inatsimmik suliaqarnermik misilittagallit ilisimasaannik malinnaallutalu katersisinnaasimavugut, qularinngilaralu ilisimasat pissarsiavut isumassarsiorfissatut atorsinnaallutigit, Tunngaviusumik Inatsisissaq pillugu Isumalioqatigiissitami siulittaasoq Ineqi Kielsen oqarpoq.
Innuttaasunut paasissutissat
Tunngaviusumik Inatsisissaq pillugu Isumalioqatigiissitamit tusagassiorfinnut nalunaaruteqarnermi ilisimatitsissutigineqarpoq, ilisimasat katersorneqarsimasut tunngaviusumik inatsisissamik piareersaalluni suliaqarnermi isumassarsiorfigineqarsinnaasut, tamatumalu kingorna suleqatigiissitanut agguaanneqassasut.
- Tunngaviusumik Inatsisissaq pillugu Isumalioqatigiissitaq sinnerlugu peqataaneq pissarsiffiusimaqaaq, isumalioqatigiissitallu suliaqarnera aaqqissuussinermi peqataasunit soqutigineqarluarsimalluni. Tunngaviusumik Inatsisissaq pillugu Isumalioqatigiissitamit qilanaarineqarpoq, paasissutissanik Kalaallit Nunaanni innuttaasunut siammarterinissaq, Ineqi Kielsen oqarpoq.
Tunngaviusumik Inatsisissaq pillugu Isumalioqatigiissitami aalajangeeqataasinnaanatik ilaasortat Reykjavikimiittumi Harpa-mi oktobarip 14-ani aaqqissuussami saqqummiussipput. Tamatuma saniatigut immikkut qaaqqusaasimasut matoqqasumik suliaqartinneqarput, tassani inuit Tunngaviusumik Inatsimmik suliaqarnermi ilisimasallit nunani issittumeersut peqataallutik.
Kalaallit Nunaat soqutigineqarluartoq
Allattoqarfimmi pisortap Maliina June Jørgensenip ataatsimeersuarnermut peqataasimasup Sermitsiaq.AG-mut oqaluttuara, Islandimut tikeraarnerminni tikilluaqqusaalluarsimallutik.
- Ilaatigut oqaluttuunneqarpugut, nunanit tamalaanit Kalaallit Nunaannut soqutiginnilluartoqarnera erseqqissuusoq. Tamatuma saniatigut tunngaviusumik inatsisissamik suliaqarnerput soqutigineqarluarpoq. Islandimi aaqqissuisunit siunnersorluarneqarpugut, tassalu suliaqarnitsinnut atatillugu nunatsinni innuttaasunik qanimut suleqateqarluassasugut, taanna oqaluttuarpoq.