Tunngaviusumik inatsisissaq pillugu isumalioqatigiissitaq aningaasat ima amerlatigisut atorneqarput

Tunngaviusumik inatsisissaq pillugu isumalioqatigiissitamut aningaasaliissutit 2022-mi 30 millionit koruunit pallippaat.

Tunngaviusumik Inatsimmik isumalioqatigiissitap inatsimmut tunngaviusussamut siunnersuut 1. april saqqummiutissagaa naatsorsuutigineqarpoq. (Assi toqqorsivimmit)

forfatningskommissionen

Thomas Munk Veirum

marlunngo 28. uki 2023 07:54

Jens-Frederik Nielsenip Demokraatineersup Tunngaviusumik inatsisissaq pillugu isumalioqatigiissitami aningaasaqarneq pillugu arlalinnik apeqquteqaateqarpoq.

Partiimi siulittaasoq qaammatit sisamat missaanni suliarinnittoqareersorlu apeqqutigisaminut akissutisivoq.

Tunngaviusumik Inatsisissaq pillugu isumalioqatigiissitap aallartinneraniit maannamut aningaasat qassit atorneqarnersut, Jens-Frederik Nielsenip ilaatigut paaserusuppaa.

Isumalioqatigiissitap sulineranut 2017-miilli 30 millionit koruuninik aningaasaliisoqarsimasoq, naatsorsuinerup takutippaa:

2017: 5,500 mio. kr.
2018 : 5.526 mio. kr.
2019: 5.639 mio. kr.
2020: 5.657 mio. kr.
2021 : 1.974 mio. kr. (2020-miit 5.965.073 kr. atunngisat. 2021-mut nuunneqarput)
2022: 5.708 mio. kr. (2021-miit 1.955.563 kr. atunngisat 2022-mut nuunneqarput)
2023 : 0 mio. kr. (2022-miit atunngisat 2023-mut qaammatit pingasuni aningaasalersussavaat)

Jens-Frederik Nielsenip Tunngaviusumik Inatsisissaq pillugu isumalioqatigiissitami ilaasortanut politikkikkut toqqakkanut aningaasat qassit atorneqarsimanersut aamma apeqqutigaa, akissarsiat, ataatsimiinnersiutit, angalanermut aningaasartuutit, ineqarnermut aningaasartuutit allallu ilanngullugit.

Naalakkersuisulli siulittaasuata Múte B. Egedep (IA) tamanna akinngilaa, paasissutissat ujartorneqartut ataasiakkaarlugit misissomeqartariaqassammata tamannalu piffissarujussuarmik atuiffiussammat.

Isumalioqatigiissitap inatsimmut tunngaviusumut missingiutaa isumaliutissiissutitaqartoq ukioq manna 1. april saqqummiunneqassasoq naatsorsuutigineqartoq, Múte B. Egede oqarpoq.