Tunngaviusumik inatsisissaq pillugu ataatsimiititaliarsuarmi politikkerit amerlanerusunik aningaasarsisalissapput

Innuttaasut mamakujuit, cigaretit, immiaaqqat viinnillu akitsuutaasa qaffaassutaannut immikkut akiliuteqarniartut, Tunngaviusumik inatsisissaq pillugu isumalioqatigiissitami politikkerit amerlanerusunik aningaasarsisalernissartik qilanaarisinnaavaat

Qaammatit qulingiluat matuma siornatigut isumaqatigiissutaavoq, Inatsisartuni-politikkerit Tunngaviusumik inatsisissaq pillugu isumalioqatigiissitami ilaasortanngortut, inatsisartuni ilaasortatut aningaasarsiaqareernertik pissutigalugu sulinerminni aningaasarsiaqartinneqassanngitsut.

Naalakkersuitut aalajangiisimaneq tamanna allanngortissimavaat.

Tunngaviusumik inatsisissaq pillugu isumalioqatigiissitami ilaasortat, Inatsisartuni ilaasortaareersut taamalu politikkikkut suliaqarnerminni aningaasarsiaqareersut, isumalioqatigiissitami sulinerminnut atatillugu ukiortaamiit aningaasarsisalissapput.

Naalakkersuitut tamanna novembarip 14-iani aalajangerpaat.

Isumalioqatigiissitap sulinissaanut piffissarisitaq ukiup affaanik sivitsorneqartoq

Naalakkersuisuttaaq Tunngaviusumik inatsisissaq pillugu isumalioqatigiissitap aallartinneqarneranit qaammatit qulingiluat ingerlareersut, isumalioqatigiissitap sulinissaanut piffissarititaq sivitsorniarlugu isumaqatigiissutigisimavaat.

Martsip qaammataani naatsorsuutigineqarsimagaluarpoq, Kalaallit Nunaanni tunngaviusumik inatsisissamut missingiut 2021-mi juunip 21-ani inuiattut ullorsiornermi piareerneqarsimassasoq. Naalakkersuisut ataatsimiinnermi ataatsimi sulinissamut piffissarititaq ukiup affaanik sivitsorniarlugu aalajangiussimavaat, taamaalilluni suliap naammassineqarfissaa 2022-mi januaarip aallaqqaataanut kinguartinneqarsimavoq.

Akileraartartunut tamanna qanoq immikkut aningaasartuutaassanersoq suli tamanut tusarliuteqqusaanngilaq, suliaq aningaasaqarnermut ataatsimiititaliamut suliamik suli suliarinnissimanngitsumut ingerlateqqinneqarsimanera pissutigalugu.

Powered by Labrador CMS