Tunngaviusumik inatsisissamut siunnersuut Naalakkersuisunut tunniunneqarpoq
Inatsit tunngaviusussaq pillugu Isumalioqatigiissitat siulittaasuata, Ineqi Kielsenip, Kalaallit Nunaata tunngaviusumik inatsisissaanut missiliut isumaliutissiissutitaqartoq Naalakkersuisut siulittaasuannut tallimanngornermi tunniuppaa.
Tunngaviusumik inatsisissamut missiliut, kiisalu Inatsit tunngaviusussaq pillugu Isumalioqatigiissitat isumaliutissiissutaat – kiisami – piareerlunilu Naalakkersuisut siulittaasuata Múte B. Egedep nerrivianiilerpoq.
Inatsit tunngaviusussaq pillugu Isumalioqatigiissitat siulittaasuata, Ineqi Kielsenip, Isumalioqatigiissitat suliaat, tallimanngornermi 31. marts Múte B. Egedemut (IA) tunniuppaa.
- Sivisuumik suliarineqarsimavoq piffissallu ilaanni unammillernartoqartarsimalluni. Maanna missingiut tigusimavarput, aammalu Inatsisartunut qanoq suliap ingerlateqqinnissaanut isummertussanut ingerlateqqissinnaallugu, Múte Bourup Egede, tusagassiuutinut nalunaarummi taama oqarpoq.
Tunniussisoqarnerali tunngaviusumik inatsisissamut siunnersuutip imarisaanik maannamut kikkut tamarmik takunnissinnaalerneranik isumaqanngilaq.
Inatsisartunut aamma tamanut saqqummiussineq 28. april pissaaq, Namminersorlutik Oqartussat nalunaarummi taama ilisimatitsipput.
Sivisuumik suliaq
Inatsit tunngaviusussaq pillugu Isumalioqatigiissitat isumaliutissiissummik Kalaallit Nunaatalu tunngaviusumik inatsisissaanut missiliummik suliaqarneranni ilaasortat taarserarput.
Suliap sivisuumik ingerlanerani sivisuumik suliamik unitsitsigallartoqartarlunilu sulinermut saniatigut aningaasaliiffiusarsimavoq.
Missiliut Inatsisartunut ilaasortanit atuarneqarnissamut piareertoq, Isumalioqatigiissitat siulittaasuat, Ineqi Kielsen ilisimatitsivoq:
- Upernaakkut ataatsimiinnermut atatillugu Inatsisartut tamarmik tikerareersimalerpata pisortatigoortumik tunniussinissaq påskep kingorna pissaaq. Taamaalillutik Inatsisartuni ilaasortat persuarsiornermut peqataanissamut periarfissaqalissapput, Ineqi Kielsen oqarpoq.