Tunngaviusumik inatsit

Tunngaviusumik inatsisissamik tuaviuussineq ataatsimiititaliap isornartorsioraa

Tunngaviusumik inatsiseqalernissaanik siunnersuusiortussamik isumalioqatigiissitamik pilersitsinissamut siunnersuut Naalakkersuisut pisariaqartumik pimoorussinatik suliarigaat, Inatsisinut Ataatsimiititaliaq isumaqarpoq

Ukiaanerani ataatsimiittoqarnerani tallimanngornermi unnukkut immikkoortoq nutaaq ilanngunneqarpoq, tassa tunngaviusumik inatsiseqalernissaanik siunnersuusiortussamik isumalioqatigiissitamik pilersitsinissaq.

Inatsisartut arfininngornermi ualikkut siunnersuut suliarinissaanut piaartumik aggersarneqarput. Pilersaarut malillugu ullumikkut taanna akuerineqassaaq.

Atuaruk: Inatsimmut tunngaviusussamut amerlanerussuteqartut

Kinguaariit tulliuttut tupigusuutigissagaat
Aalajangiineq taama annertutigisoq peqqissaarullugu oqaluuserineqartariaqaraluartoq, ataatsimiititaliaq isumaqarpoq.

- Annilaanngatigineqarsinnaavoq matuma kingornatigut kinguaariillu tulliit tupigusuutigissagaat, imminnullu aperalutik ilumut tunngaviusumik inatsisissaq pillugu Kalaallit Nunaanni isumalioqatigiisitamik pilersitsinissamut aalajangiineq ima pingaaruteqanngissimatigisinnaasoq, allaat Inatsisartut innuttaasullu siunnersuummut isummernissaminnut eqqartuinissaminnullu sapaatip-akunnerata naaneranik taamaallaat piffissaqartinneqarlutik, ataatsimiititaliaq siunnersuummut isumaliutissiissutimini allappoq.

Atuaruk: Takussutissaq: Isumalioqatigiissitap suleriusissaa aana

Nassuiaat 100-nik quppernilik
Aalajangiinermut tunngaviusoq nassuiaat kalaallisoortoq 100-nik qupperneqarpoq, qallunaatoortorlu 80-inik qupperneqarluni, taanna tallimanngornermi unnukkut tunniunneqarpoq. Kalaallisut allanneqarsimasoq aamma oqaatsitigut amigarnerarlugu isornartorsiorneqarpoq.

Arfininngornermi oqallittoqarnerani oqaaseqartartut tamarluinnarmik nassuerutigaat, nassuiaatip atuarnissaanut piffissaqarsimanatik.

Atuaruk: - Ulloq pingaarutilik

Apeqqutit ammasut
Siunnersuut sapinngisartik atorlugu pitsaanerpaamik suliarisimallugu, Inatsisinut Ataatsimiititaliap naqissuserpaa. Apeqqutinik ammasunik arlalinnik pilersitsisoq, tamatuma peqataanik paasivaa.

Atuaruk: Namminersulernissamut aqqutissat arlallit

Naalagaaffeqatigiinnermi atuuttussamik isumalioqatigiissitaq tunngaviusumik inatsimmut siunnersuummik suliaqassanersoq, imaluunniit Kalaallit Nunaat aatsaat namminersortunngorpat atuutilissanersoq ersernerluppoq. Periarfissat pingajoraat, ilaat maanna atuutilissasut, ilaallu namminiilivinnerup kingorna atuutilissallutik.

Isumalioqatigiissitami ilaasortat qanoq toqqarneqartarnissaat aamma ersarinngilaq. Siunnersuut akuerineqassappat Naalakkersuisut isumalioqatigiissitap suliarisassaannut allassimaffimmik aalajangiillutillu ilaasortanik toqqaasinnaanissamut piginnaatinneqalissapput.

- Tamanna aappaatigooqartutut paasineqarsinnaavoq, tassami toqqagassanik taakkuninnga aalajangiisussat Inatsisartuunissaat / Inatsisartuni ataatsimiititaliaanissaa nassuiaammi erseqqissumik piumasaqaataammat, ataatsimiititaliaq isumaliutissiissummi allappoq.

Atuaruk: Tunngaviusumik inatsisiliornissamut ataatsimiititaliaq Inatsisartunit suliaripallanneqartoq

Piffissaanersoq nalornissutaasoq
Kalaallit Nunaata siunissami namminersulivinnissaanut maanna tunngaviusumik inatsimmik suliaqarnissaq maanna isumassarsiatsialaanersoq, ataatsimiititaliap tunngaviusumik nalornissutigalugu oqaatigaa.

- Illuatungaatigut tamaanna innuttaasut kinaassusiannik ataqatigiinnerannillu nukittorsaatitut nalilerneqarsinnaavoq (”nation-building”), soorluttaaq innuttaasut namminiilivinnissaq pillugu aalajangiussinnginnerminni tunngaviusumik inatsimmut missingiummik isummerfigisinnaasaminnik peqarnissaat pitsaaquteqarsinnaasoq.

Atuaruk: Inatsisartut immikkut ittumik ataatsimiissapput

- Aappaatigut imaassinnaavoq namminiilivinnissaq pillugu aalajangiussisoqannginnerani suli ukiut arlallit ingerlajumaartut, apeqqutaalerporlu taamanikkut naalakkersuinermik suliaqartuujumaartut Kalaallit Nunaanni tunngaviusumik inatsit pillugu aalajangiussiumaartut, isumalioqatigiisitap isumaliutissiissusiaanik ukiunik arlalinnik pisoqaassusilimmik, namminneq sunniuteqarfigisimanngisaminnik immaqalu ataasiakkaatigut naleqqukkunnaareersimasumik, tunngaveqarlutik aalajangiussinissatik kissaatigissaneraat, ataatsimiititaliaq nangilluni allappoq.

Atuaruk: Kim Kielsen tulluusimaartoq: Namminersulernissamut ingerlariarneq pingaarutilik

Ataatsimiititaliap isumalioqatigiissitaq malinnaaffigissavaa
Naak isornartorsiorneqaraluartoq ataatsimiititaliami amerlanerussuteqartut IA-meersut Siumumeersullu, Naalakkersuisut tunngaviusumik inatsiseqalernissamut isumalioqatigiissitamik pilersitsinissamut piginnaalersinnissaat akuerineqarnissaa innersuussutigaat.

Erseqqissartarialinnik ajornartorsiutit Inatsisartut partiinit tamaneersunit sinniisunik pilersitsinerisigut aaqqiivigineqassapput, taakku isumalioqatigiissitap sulineranik malinnaassapput.

Atuaruk: Inatsimmut tunngaviusussamut nalunaajaammik nutaamik IA perusuppoq

Demokraatit akerliusut
Demokraatit siunnersuummut akerliupput. Inatsisartut ataatsimoortut isumalioqatigiissitap sulinissamut tunngavia aamma katiterneqarnerat akuerisariaqaraat, taakku isumaqarut.

- Demokraatit suliamik ingerlatseriaaseq pillugu kiisalu oqartussaaqataaneq pillugu paasinneriaatsimut ersersinneqartumut assorsuaq isumaliornartoqartitsipput, Demokraatit allapout.

Inatsisinut Ataatsimiititaliami ilaasortaapput Anders Olsen (S), Laura Táunâjik (S), Debora Kleist (IA), Iddimanngiiu Bianco (IA) aamma Michael Rosing (D).

Powered by Labrador CMS