Skip to main content

Tunngaviusumik inatsisip marlunnik ingerlasup naalagaaffimmit tapiissutit annaassinnaavai

Kalaallit Nunaata namminiilivinnissaanut tunngaviusumik inatsimmik taasineq, naalagaaffeqatigiinnermit aninermik kinguneqarsinnaavoq. Danmarkimi inatsisit tunngaviusut iluanni tunngaviusumik inatsiseqarnikkut tamanna pinngitsoortinneqarsinnaavoq.

Statsministerip Lars Løkke Rasmussenip (V) kalaallit namminiilivinniarnerat oqallisigitillugu mianersortariaqarnini ilisimalluarpaa.

Taamaammat Sermitsiaq.AG-mi apersorneqarnermimi, Kalaallit Nunaata namminiilivinnissaanut inatsimmik taasineq Naalagaaffeqatigiinnermit aninermik paasineqarsinnaasoq oqaatigigamiuk, qanorpiaq isumaqarnerluni itisilerusuppallaanngilaa. 

Naak aamma tunngaviusumik inatsit ingerlaannaq atuutilertussaanngikkaluartoq.

- Kingusinnerusukkut atulertussanngortumik namminiilivinnissamik taasineq qallunaat naalakkersuisuisa kalaallillu naalakkersuisuisa akornanni sulinermik aallartitsisussaavoq. Naalagaaffiimmi innuuttaminnut pisussaaffii tunngavigalugit apeqqutit assigiinngitsut tamatumani eqqartorneqartussaapput, soorlu innuttaassuseqarnermut tunngasut, statsministeri oqarpoq 2001-imilu Savalimmiormiut taamaapajaartumik piumasaqarfigineqarsimanerat innersuussutigalugu.

Tunngaviusumik inatsit sorleq pineqarnersoq ersernerluttoq
Ministeriunerup taamatut oqaaseqarnerata qanoq paasineqartariaqarneranik nassuiaanissamik soqutiginnippallaannginnera, tunngaviusumik inatsimmut sorlermut siunnersuut isumalioqatigiissitap anguniassaneraa paasiuminaatsinneranik pissuteqarpoq.

- Kalaallit Nunaammi Naalagaaffeqatigiinnermut ilaajutigaluni tunngaviusumik inatsiseqarniarpat naammassiniagassaqarnera soorunami eqqarsaatigisariaqarpoq. Tunngaviusumik inatsit allamik siunertaqartoq kingusinnerusukkullu atuutilertussaq suliarigaanni taava naalagaaffeqatigiinnermut ilaajunnaarnertut isumalimmut pisimassaagut, taanna oqarpoq.

Tunngaviusumik inatsisit marluk, aappaa Danmarkimi tunngaviusumik inatsisip ataani atuuttoq, aappaalu namminiilivinnerup kingorna atuuttussap, Kalaallit Nunaata Naalagaaffeqatigiinnermi ilaaginnarnissaanut, taamaalillunilu naalagaaffimmit tapiissuteqaannarnissamut qulakkeerisussanngorsinnaavoq.

Tunngaviusumik inatsisit marluunerat namminiilivinnissamut naalakkersuisup, Suka K. Frederiksenip (S) tunngaviusumik inatsimmut isumalioqatigiissitamut allannikuuaa.

Sermitsiaq.AG-p taamaammat aperaa, Lars Løkke Rasmussenip ajornartorsiut taanna Folketingimi qaqitaa, isumalioqatigiissitamut taamatut aalajangiinerup tunuliaqutigineraa.

- Marlunnik suliaqarnerup toqqarneqarneratigut periarfissat amerlanerusut ammarneqarput, tamatumalu isumalioqatigiissitaq qanoq iliornissamut kiffaanngissuseqarnerulersissavaa, Suka K. Frederiksenip akissutaa erseqqarippallaanngitsoq taama nipeqarpoq.

Tunngaviusumik inatsissap ilaa imaluunniit tamaat kingornatigut innuttaasunit taasissutigineqassanersoq, isumalioqatigiissitap nammineerluni siunnersuuteqarfigissavaa.

- Pisussat assigiinngitsut marluk
Danmarkip tunngaviusumik inatsisaata ataani atuuttussamik taasigaanni, taava maannamut kingunissaqanngilaq. Lars Løkke Rasmussenip naliliinera taamaappoq.

- Pisinnaasulli marluk assigiinngitsuunerat nipaatsumik eqqaaginnarpara, soorlu ima oqaraluaraanniluunniit: Kalaallit Nunaat Naalagaaffeqatigiinnermut ilaasoq kinaassutsitsinnik oqaatiginnittumik tunngaviusumik inatsiseqartoq, qularnanngitsumillu allanngortinniaraanni taamaasiornissamut sulissutigisassanik eqqarsaateqartoqartoq, taava tamanna aataqqisariaqarpoq. Imaluunniit  allatut pilluni naalagaaffeqatigiinneq eqqaanagu namminiilivinneq kisiat eqqaaneqartoq.

Naak naalagaaffeqatigiinnerup iluani tunngaviusumik inatsit namminiilivinnissamik anguniagaqaraluartoq, namminiilivinnissamuinnaq tunngasumut sanilliullugu danskit naalakkersuisuisa tamanna tunngaviusumik allatut paasissavaat.

Paasiuminaattoq
Taamaattorli tunngaviusumik inatsisissamut isumalioqatigiissitap sorleq toqqassaneraa suli paasiuminaappoq. Isumalioqatigiissitap siulittaasuatali Vivian Motzfeldtip (S), tunngaviusumik inatsit Kalaallit Nunaata namminiilivinnissaanut atuutissasoq aalajangiusimallugu AG-mut oqaatigaa.

- Isumalioqatigiisitamut ilaasortat Kalaallit Nunaata namminiilivittup tunngaviusumik inatsisissaa suliarissallugu isumaqatigiipput, Vivian Motzfeldt allappoq, taamalu isummiussimasani avataaniit isigalugu millimeterimilluunniit nikisinnagu.

Lars Løkke Rasmussenili allatut nipilimmik Vivian Motzfeldtimit oqarfigineqarsimavoq.

- Vivian Motzfeldt kingullermik naapikkakku nalunaarutigaa, 'tunngaviusumik inatsit danskit tunngaviusumik inatsisaata ataani atuuttoq nammineq tunngaviusumik inatsiseqalernissatsinnut ikaarsaarneq pitsaanerussappat, taava taanna soorunami toqqarneqarumaarpoq', ministeriuneq oqarpoq.

Kalaallit Nunaat namminiilivinnissamut sulinermik aallartitaqarpat, taava naalagaaffimmit tapiissutit ukiut arlaqanngitsut qaangiuppata peerumaartut qularutiginngilaa.

Lars Løkke Rasmussenip ullumikkut naalagaaffeqatigiinneq pillugu ataatsimiinnermi tunngaviusumik inatsit sorleq toqqarneqarumaarnersoq paasiniaaffiginiarlugu oqaatigaa.

AG-mi ullumi saqqummertumi tamanna pillugu arlalinnik allaaserisaqarpoq:

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER