Tunngaviusumik inatsisassaq ukiut marluk pingasut qaangiuppata piariissaaq

Tunngaviusumik inatsisissaq pillugu isumalioqatigiissitami toraagalinnik anguniagaqarluni sulisoqassaaq, piffissaliunneqartoq eqqorneqassappat.

Naalakkersuisut sukkanerpaamik inernernik takunissaminnik naatsorsuuteqartut tunngaviusumik inatsisissami allassimavoq.

- Anguniagaavoq, isumalioqatigiissitap pilersinneqarneraniit ukiut pingasut qaangiutsinnagit sulineq naammassissasoq, aamma Kalaallit Nunaata aaqqissuussaaneranut aqunneqarneranullu maleruagassanut tunngaviusunut missingersuummik imaqartoq isumaliutissiissutini naammassippagu saqqummiunneqassaaq, suliassap nassuiarneqarnerani allaqqavoq.

Suliassap nassuiarneqarnera uani kalaallisut qallunaatullu allassimasoq atuarsinnaavat.

Paragraffit namminiilivinnissap siornatigut kingornatigullu
Naalakkersuisut sulinerup sivitsoqqinnissaanut akuersisinnaatitaapput.

Nunap aaqqissuussaaneranut aqunneqarneranullu maleruagassanut tunngaviusussanut missingersuusiami inatsiseqarfiusup assinganut allanik aalajangersakkanik piareersaasoqassanersoq isumalioqatigiissitap nammineq nalilerlugulu aalajangissavaa. Taamaalilluni nunap aaqqissuussaaneranut aqunneqarneranullu maleruagassani tunngaviusuni immikkoortup assingani piffissami danskit naalagaaffianiinnerup nalaani atuuttunik aalajangersagaqarluni, aamma aalajangersakkat nutaat aatsaat namminiilivittoqalerpat taarsiullugit atuutilernissaannut piareersimallutik. Imaluunniit assersuutigalugu nunap aaqqissuussaaneranut aqunneqarneranullu maleruagassani tunngaviusuni immikkoortunut ataasiakkaanut tamanut ataasiinnarmik aalajangersagaqarluni. Aalajangersakkat ilai piffissami danskit naalagaaffianiinnerup nalaani atuutissapput, aalajangersakkallu sinneri Kalaallit Nunaat namminiilivippat atuutilissallutik.

Namminiilivinnissamut inatsisit tunngaviusut
Sulinermi suut pingaartinneqassanersut ersarissumik allassimapput.

- Tunngaviusumik inatsisissamut missingiussaq Kalaallit Nunaanni tamat oqartussaaqataaneratigut akuerisaassaaq, inatsisinnilu tunngaviussalluni Kalaallit Nunaat naalagaaffinngorpat, allaqqavoq.

Innuttaasunik peqataatitsineq
Piffissaliunneqartoq sivikippat nuna tamakkerlugu innuttaasut peqataatinneqarnissaat peqqutaassaaq. Innuttaasut aamma akulerunnissaminnut periarfissaqassapput.

- Kalaallit Nunaanni innuttaasut tamarmik inatsisinut tunngaviusussanut isumalioqatigiisitamut siunnersuutinik saqqummiussinissamut pisinnaatitaaffeqarput. Isumalioqatigiissitami ilaasortat, siulittaasoqarfik aggersitallu aalajangersinnaapput siunnersuut taamatut ittoq isumalioqatigiissitami qaqinneqassasoq, siunnersuut isumalioqatigiissitami suliareqqinneqarnissaanut tulluarpat, allaqqavoq.

Inatsiseqarnermut ministeri peqataatinneqartoq

Tunngaviusumik inatsisissaq pillugu Isumalioqatigiissitamut aalajangeeqataasinnaanatik aalajangersimasumik peqataasartussanik marlunniit sisamanut toqqaasinnaapput. Tunngaviusumik inatsisissaq pillugu Isumalioqatigiissitaq marlunniit sisamanut aalajangersimasunik Tunngaviusumik inatsisissaq pillugu Isumalioqatigiissitamut aalajangeeqataasinnaanatik peqataasartussanik toqqaasinnaavoq. Taassuma saniatigut piffissani sivikinnerusuni aalajangeeqataasussanik allanik ilanngussisinnaalluni.

Tunngaviusumik inatsisissamut isumalioqatigiissitap sulinerminit Inatsiseqarnermut ministereqarfik Københavnimiittoq peqataatissavaa, taamaalilluni tunngaviusumik inatsisissami aalajangersakkanut missingiussaq ingerlaavartumik Inatsiseqarnermut ministereqarfiup nalilersorneqarsinnaaneri qulakkeerneqarlutik. Savalimmiunili taamatut suliaqarneq oqitsuinnaasimanngilaq.

Eqqartukkat isertuussat
Naak isumalioqatigiissitap sulinerminni innuttaasunik peqataatitsisartussaagaluarlutik eqqartugassat ataasiakkaat matoqqasumik eqqartussallugit aalajangersinnaapput.

- Killilersugaanngitsumik oqalliffiusinnaasunik apeqquteqarfiusinnaasunillu allanut oqaatigeqqusaanngitsunik ataatsimiinnernik ingerlatsinissamik pissutissaqartumik isumalioqatigiissitaq pisariaqartitsisinnaavoq. Tamanulli ammanissaq Inatsisartullu ilanngunneqarnissaat eqqarsaatigalugit tunngaviusumik inatsisinut missingiummik inaarutaasumik annertunerusumik piginneqataanissaq aamma pingaartinneqartariaqarpoq, allaqqavoq.