namminiilivinneq
Tunngaviusumik inatsimmut taasititsinissamik pilersaaruteqartoqanngitsoq
Tunngaviusumik inatsisissamik inaarsagassamik piareertoqarpat, Naalakkersuisut qanoq pisoqarnissaanik pilersaaruteqanngikkallarput. Tunngaviusumik inatsisip marlunnut avillugu ingerlanneqartup naalagaaffimmit tapiissutit pisartagariinnarnissaannik qulakkiissavaa
Tunngaviusumik inatsisissaq piareerpat, siunnersuummik ingerlaannaq innuttaasunut taasititsinissamik aalajangersimasumik pilersaaruteqartoqanngilaq.
Namminiilivinnissamut naalakkersuisup Suka K. Frederiksenip (S) allagaqarluni Sermitsiamut akissuteqarnermini tamanna naqissuserpaa.
Danmarkimi ministeriuneq Lars Løkke Rasmussen (V) sapaatip-akunnerani kingullermi Folketingimi oqallittoqarnerani, Kalaallit Nunaannut tunngaviusumik inatsisissaq innuttaasunik taasititsinermi akuerineqarpat, Kalaallit Nunaata naalagaaffimmit tapiissutit annaanissaat naqissusermagu apeqqut qaqinneqaqqittariaqalerpoq.
Taamaattoqarpammi danskit naalagaaffiata naalagaaffeqatigiinnermit aninertut nalilertussaammagu.
Aamma atuaruk: Løkke: Tunngaviusumik inatsisissaq atuutsilerneqarpat bloktilskudi peerneqassaaq
Naalagaaffimmit tapiissutit peerneqarsinnaasut
Ingerlaannaq innuttaasunik taasititsisoqarnissaa kisianni qularnarpoq, Suka K. Frederiksen (S) allappoq.
- Tunngaviusumik inatsisissamut isumalioqatigiissitap suliani naammassippagu, isumaliutissiissutaat Inatsisartunut saqqummiunneqassaaq, tassanilu qanoq tulliani alloriartoqarnissaa oqaluuserineqassaaq.
- Tunngaviusumik inatsisissamut missingiutissaq qaqugu innuttaasunit taasititsissutigineqassanersoq Naalakkersuisut taamaammat maanna akisinnaanngilaat, Suka K. Frederiksenip apeqqutigineqartoq avaqqullugu taama akissuteqartoq.
Erseqqinngitsumik akisoq
Tunngaviusumik inatsimmut pilersaarutit marlunnut avillugit qanoq suliarineqarnissaat tusarusussimavarput - tassami ataatsip namminiilvinnissaq sioqqullugu atuuttup, ataatsillu namminiilivinnerup kingorna atuuttussap - ukiut arlaqanngitsut ingerlanerini Naalagaaffeqatigiinnermit, taamaalillunilu naalagaaffimmit tapiissutit annaannginnissaannik pissuteqarmat.
- Tunngaviusumik inatsisissamut isumalioqatigiissitap marlunnik inatsisissanut missingiutinik allannissamik suliassaqarput, tassani Naalagaaffeqatigiinnerup iluani aappaa atuussinnaassoq, taamaattorli isumalioqatigiissitap qanoq ilusilersorneqarnissaa aamma aaqqiissutinut taakkununnga marlunnut piffissaq qanoq annertutigisoq atorneqassaneraanut ataatsimut aaqqissuussinissaq nammineq aalajangissavaat, akissummi tamanna allaqqavoq.
Marlunnik suliaqarneq qanoq iliornissamut kiffaanngissuseqarnarnerusoq
Kisianni oqaaseqatigiit tulliini oqamisaarutigineqarpoq, Naalakkersuisut saaffissaarunnissaq pinngitsoorniarlugu tunngaviusumik inatsisinik marlunnik suliaqarneq pissuteqartoq.
- Marlunnik suliaqarnerup toqqarneqarneratigut periarfissat amerlanerusut ammarneqarput, tamatumalu isumalioqatigiissitaq qanoq iliornissamut kiffaanngissuseqarnerulersissavaa, akissummi tamanna allaqqavoq.
Tunngaviusunik inatsisinik marlunnik isumalioqatigiissitap suliaqarnissaa Naalakkersuisut aalajangiunnikuuaat. Naak isumalioqatigiissitami siulittaasoq, Vivian Motzfeldt (S) akerliugaluartoq, taannalu Kalaallinut Nunaannut namminiilivittumut tunngaviusumik inatsisiliortoqarnissaanik isumaqaraluartoq tamanna pivoq.