namminiilivinneq
Tunngaviusumik inatsimmik suliaqarnerup nuna ataatsimoortissavaa
Tunngaviusumik inatsisissaq pillugu isumalioqatigiissitap siulittaasortaavata, Vivian Motzfeldtip siunissami nunap tunngaviata ilusilersornissaanut kikkut tamarmik peqataatinnissaat suliassat pingaarnersaattut isigaa.
Avannaa, kujataa, kangia, kitaa - nunami assigiinngissutsit annertupput. Inuuniarnikkut atukkatigut, oqaatsitigut aamma kulturikkut ersertarput.
Taamaammat tunngaviusumik inatsisissaq pillugu isumalioqatigiissitap siulittaasuata, Vivian Motzfeldtip (S) nuna katersuutsinnissaa pingaarnertut suliassatut isigaa, tamanna Kalaallit Nunaata namminersulivinneranik kinguneqassaaq.
- Uani sulinermi kikkut tamarmik toqqissisimanermik misigissapput. Tunngaviusumik inatsisissaq kikkut tamarmik pigisutut misigissavaat, taanna Sermitsiaq.AG-mut oqarpoq.
Inoqarfiit tamarmik peqataassapput
Taamaattumillu sulineq qaqugu naammassineqarumaarnersoq piffissaliussinianngilaq. Sulinerup peqqissaarunnissaa tassunga pingaarneruvoq.
- Suliaq una uagut politikerit innuttaasunut tunniussassarinngilarput. Nunaqartut tamarmik ilusilersueqataaffigissavaat, isumalioqatigiissitami siulittaasoq oqarpoq.
Nunami inoqarfiit tamarmik sassartitaqarnissaat takorloorpaa, taanna tunngaviusumik inatsimmik suliaqarnermut siunnersuuteqarsinnaasassaaq.
- Taamaalilluni kujataani savaatilik aamma avannaani piniartoq aamma kiinarsineqassapput. Tamanna uannut pingaaruteqartorujussuuvoq, Vivian Motzfeldt oqarpoq, sulineq suli aallartinngimmat tamanna maanna eqqarsaatigigallarlugu naqissuserpaa.
Kalaallit Nunaannut suna ataatsimoorfiua?
Kalaallit Nunaat suliamik nuna tamakkerlugu oqaluuserineqartumik, suut ataatsimoorfiginerlugit sivisuumik pisariaqartitsisimasoq taanna isumaqarpoq.
- Ataatsimut naleqartitagut oqaluuserinissaannut piffissanngorpoq. Aaqqiissutinik atasussanik nassaassagutta akisussaaffeqarnermik pilersitsisoqartariaqarpoq, Vivian Motzfeldt oqarpoq.
Taassuma oqaatsit pillugit oqallinneq tikkuarpaa, ataatsimut tunngavissamik pilersitsisoqassappat, taassuma isaanik illuatungeriit tamarmik tusaaneqarnissaat pingaaruteqartoq.
- Kalaallit ilaasa qallunaatut oqalunneq toqqissisimanarinerusaraat oqaluttuassap ilaani ataqqisariaqarparput. Saniatigullu kalaallisut oqaluttorpassuit, assersuutigalugu ilinniarnermut tunngatillugu ajornakusoortitsisartut.
Sapaatip-akunnerini kingullerni misigineqaqqittumit taamaaliornikkut oqallinneq allatut nipeqarluni ingerlanneqarsinnaassasoq, taanna isumaqarpoq.
Atuaruk: Tunngaviusumik inatsisissaq pillugu isumalioqatigiissitaq maanna inissinneqarpoq
Tamatuma saniatigut tunngaviusumik inatsisissap suliarineqarneranut inuiaqatigiinni unittoorsinnaasutut ernummatigisamini ineriartornermut tamanna alloriarnerusinnaasoq isigaa.
- Naalagaaffittut namminersulivinnissamut alloriarnerit tullii tigunissaat pingaaruteqarpoq, tamatumalu saniatigut nunarsuup sinneranut ammanerulernissarput.
Tunngaviusumik inatsisissaq pillugu isumalioqatigiissitami ilaasortat ulluni qaninnerni siullermeerlutik naapissapput.