Tunngaviusumik inatsimmik suliaqarneq: Immikkoortoq assortuussutaasoq peerneqartoq

Isumalioqatigiissitap suliassaata nassuiarneqarnerani nutaami, Tunngaviusumik inatsisissaq pillugu isumalioqatigiissitap sulineranut tunngaviliisussami, immikkoortoq qitiusoq allanngortinneqarpoq.

Isumalioqatigiissitap suliassaata nassuiarneqarnerani, Naalakkersuisut aamma partiit illuatungiliuttut isumaqatigiissutigisaanni, Sermitsiaq.AG-mit pissarsiarineqarsimasumi tamanna atuarneqarsinnaavoq.

Sammisaq assortuussutaasoq

2017-imi Tunngaviusumik inatsisissaq pillugu isumalioqatigiissitaasimasumi suliassat nassuiarneqarnerini immikkoortoq isornartorsiorneqarlunilu sakkortuumik oqallisigineqarpoq.

Suliassat nassuiarneqarnerini oqaaseqatigiit uku ilanngunneqarsimapput, taakkulu Inatsisartuni aalajangerneqarsimanngillat:

”Kalaallit Nunaata tunngaviusumik inatsisissaa pillugu isumalioqatigiissitaq immikkoortunik marlunnik siunnersuusiussaaq. Immikkoortoq siulleq Namminersorlutik Oqartussat ataanni atuutilersinneqarsinnaassaaq danskillu naalagaaffiannut killissaliinerup iluani Kalaallit Nunaannut tunngatillugu danskit naalagaaffiata tunngaviusumik inatsisaannut tapertaasinnaassalluni. Immikkoortup aappaa Kalaallit Nunaat tunngaviusumik inatsimmit danskillu naalagaaffiannit ilaajunnaarpat, aammalu inuiaat kalaallit namminiilivittutut naalagaaffeqalerpata aatsaat atuutilersinnaassaaq”.

Motzfeldt akerliuvoq

Maajumi 2017-imi Tunngaviusumik inatsisissaq pillugu isumalioqatigiissitami siulittaasunngorlaaq Vivian Motzfeldt aviisimut Sermitsiamut ima oqaaseqarpoq:

- Assigiinngitsuusut takuakka, kisianni Inatsisartut peqataatinnagit Naalakkersuisut Inatsisartut aalajangigaannik allanngortitsisinnaanngillat. Ataatsimiittarfimmiuna aalajangerneq atuuttussaasoq, Vivian Motzfeldt taamani Sermitsiamut oqarpoq.

Taamaalilluni Tunngavisumik inatsisissaq pillugu isumalioqatigiissitap sulilluni aallartinngitsorluunniit, tukattumik ersernerluttumillu sulineq aallartippoq.

Vittus: Isumaliutissiissummut naapertuuttoq

Suliassap nassuiarneqarnerani nutaami immikkoortunik marlunnik siunnersuusiornissaq peerneqarpoq.

- Tunngaviusumik inatsisissap suliarineqarnissaanut Inatsisartut isumaliutissiissutaat 21. november 2016-imi akuerineqartoq tunngaviuvoq, naalakkersuisoq akisussaaq, Aningaasaqarnermut Naalakkersuisoq, Vittus Qujaukitsoq, Sermitsiaq.AG-mut taama nassuiaavoq.

Ilaasortat ilaasortanngornerannut aamma ilaasortaajunnaanerannut sinaakkutit atuuttut nassuiarnissaat annertuumik suliarineqartoq ersarippoq.

- Ataatsimiititaliap isumalioqatigiissitap suliassaanik nassuiaasiornermini ilaasortat ilaasortanngornerannut aamma ilaasortaajunnaarnerannut tunngasunik sammisaqarnerat malunnarpoq, taamaattumillu aamma ilaasortat sinniisaat sulissutigineqarput. Ataatsimiititaliap tungaanit pitsaasumik ukkatarinninnerusoq isumaqarpunga, Vittus Qujaukitsoq oqarpoq.

Powered by Labrador CMS