Kangaatsiaq
Tunisassiorfimmi eqaarsaaqatigiittarneq nuannarineqarluartoq
Kangaatsiap tunisassiorfiani sulisut ullaakkut eqaarsaaqatigiittarnertik qiimmatsaatigaat
Kangaatsiami Royal Greenlandip tunisassiorfiani tasisaarut atorlugu eqaarsaarneq sulinermi nuannaartitsivoq.
Tassami ullut tamaasa nalunaaqutaq qulinut ataatsimut eqaarsaartoqartarpoq, sulisullu tamanna qiimmatsaatigaat.
- Ataatsimoornermik aamma sulinermi nuannaarnerulernermik pilersitsisoq suleqatima uangalumi misigaarput. Aamma ullormut akunnerpassuit sulinitsinni ilaatigullu oqimaatsunik kivitsisarluta sulisaratta timitta aalatinnerulernera iluaqutigaarput, Kangaatsiami tunisassiorfimmi sulisunut sinniisi tunisassiorfimmi ataqatigiissarisutut sulisoq, Aqqalu Martin Lynge oqarpoq.
Allannguisitsivoq
Taassuma eqaarsaaqatigiinnermi suleqatini ilitsersuuttarpai. Kingusinnersukkut timi tamakkiinerusoq eqaarsaarnermi ilitsersuut atulerumaarlugu taanna oqarpoq.
- Naak tasitsaarluta eqaarsaaqatigiittarnerput minutsit tallimat qulillu akornnanni sivisussuseqaannartaraluartoq timinni sunniuteqartoq malugisimavara. Nuannaarnerulerpunga aamma timera eqaannerulerpoq, Aqqaluk Martin Lynge suliffeqarfissuut nittartagaanut oqarpoq.
Suliffeqarfinnut allanut innersuut
Taamaattumik Aqqaluk Martin Lyngep tunisassiorfiit suliffeqarfiillu allat suliffimmi eqaarsaaqatigiittarnissamut innersuuppai.
- Eqaarsaartarnermi timimut peqqinnerulersitsiinnarani sulinermik nuannaalersitsillunilu ataatsimoornermik misigilersitsimmat, Aqqaluk Martin Lynge oqarpoq.