Tunillatsittoqarsimasoq: Coronavirusi Kalaallit Nunaannut annguppoq

- Maanna qanoq iliuuseqassanerluta nalilersuissaagut, Kim Kielsen ataasinngornermi tusagassiortunik katersortitsinermi oqarpoq, tassani aamma kaammattuutigaa angalasarnernik killilersuisoqassasoq.

- Taamatut nutaamik inissisimasoqalernissaa piareersimaffiginiarlugu suliaqartoqarsimavoq. Pingaaruteqarpoq innuttaasut inassuteqaatitsinnik malinninnissaat, maanna nunatsinni tunillatsissimasoqaleratta, Kim Kielsen oqarpoq.

Kim Kielsenip oqaatigaa, utoqqaat, napparsimasut sanngiitsullu tunillanneqannginnissaat anguniarlugu akissaaffimmik tigusinissaq pisariaqartoq.

- Assersuutigalugu atuarfinnut meeqqerivinnullu tunngatillugit tullissaanik qanoq iliuuseqassanerluta nalilersuijuarpugut, Kim Kielsen nassuiaavoq.

- Uippallilernaveersaassaagut, aamma malittarisassanik nutaanik suliaqartoqareerpoq, Tuniluuttumik nappaalanersuaqarnerani ataatsimiititaliamit erseqqinnerusumik saqqummiunneqartussanik, Kim Kielsen oqaluttuarpoq.

Nunatsinni Nakorssaanerup Henrik L. Hansenip ilisimatitsissutigaa inupassuit misissorneqarsimasut.

- Pineqartoq nunani allani angalasimavoq. Najukkami tuniluuttoqarneranik takussaasoqanngilaq. Tunillatsitsimasoq Nuummiippoq. Qaammammi isumatusaarluta pisoq maanna isumagissavarput. Qaammatit pingasut tulliuttut ingerlaneranni nunamut tikittut tunillanneqasimasinnaanera naatsorsuutigisariaqarparut. Taamaammat sapinngisamik inuit ikinnerpaat nunamut tikittarnissaat isumagissavarput, Nunatsinni Nakorsaaneq oqarpoq.

- Killilersuineq suli ingerlapparput, tassa innuttaasut angerlarsimaffimminni mattuteqqatinneqarput tuniluunnerup siammarnissaa pinaveersaartinniarlugu.

Atuarfiit matuneqassanngitsut

- Soqutigisarinngilarput atuarfiit maannakkorpiaq matuneqarnissaat. Tamanna pingaarnerunngilaq. Pitsaaneruvoq inuusuttut atuarfimmiippata, tassa nukappiaqqat qulit ineeqqami ataatsimi katersuunnissaannut sanilliullugu, Nunatsinni Nakorsaaneq erseqqissaavoq.

Taassuma oqaatigaa, sumiiffimmi allami nutaamik tuniluuttoqalersinnaanera pinngitsoortinniarlugu, Kalaallit Nunaanni tamarmi sapinngisamik amerlanerpaat misissorneqarnissaat maanna sulissutigineqalersoq.

Pisumai matumani pitsaaqqutaasoq tassaavoq, tunillanneqarsimasup angerlarsimaffimmi mattussaaqqanera, taamaammaallu tuniluunnerup siaruaannissaa tunngavissaqarani.

- Tunillanneqarsimasup ilaqutaasa inassuteqaatit malissimavaat, ilaqutariillu tamarmik angerlarsimaffimminni mattussaaqqalutik, taakkulu ulluni tulliuttuni 14-ini angerlarsimaffimminni imminnut mattuteqqaannassapput, Nunatsinni Nakorsaaneq oqarpoq.

Ingerlaavartumik pisoq malinnaaffigineqassaaq...