Tunillatsissimasut nutaat qulit - Sisimiuni tuniluuttoqaqqilerpoq

Tunillatsissimasut nutaat sisamanngornermi amerleqqipput. Nunatsinni Nakorsaaneqarfiup ilisimatitsissutigaat, tunillatsissimasoq ataaseq oqaluffimmiissimasoq.

Nunatsinni Nakorsaaneqarfimmit ilisimatitsissutigineqarpoq, Nuummi tunillatsissimasut qulingiluat Sisimiunilu ataaseq ullormi kingullermi nassaarineqarsimasut.

- Sisimiuni tunillatsissimasoq meeqqat atuarfianni atuartuuvoq. Taamaalilluni Sisimiuni tuniluuttoqaqqilersimavoq, Nunatsinni Nakorsaaneqarfik allappoq.

Taamaalilluni tunillatsissimasut nutaat ullunut kingullernut sanilliullugit amerleqqissimapput. Pingasunngornermi Nuummi tunillatsissimasut tallimaasut marlunngornermilu sisamaasut nalunaarutigineqarpoq.

Nunatsinni Nakorsaaneqarfiup tunillatsissimasut amerlassusaannik nutarterinermini ilisimatitsissutigaa, Nuummi tunillatsissimasoq ataaseq sapaatiummat oktobarip pingajuani nalunaaqutaq aqqanernut Inuunerup Nutaap Oqaluffianiissimasoq (Pinsesiortut).

Oqaluffik Nuummi Ilivinnguaq 1-imiippoq.

Ullormut kisitsisit naapertorlugit marluk suli uninngapput.

Powered by Labrador CMS