Tunillatsissimasut nutaat arfineq-marluk paasineqartut
Tunillatsissimasut nutaat, Sisimiuni pingasut, Nuummi pingasut Tasiilamilu ataaseq ullup ataatsip ingerlanerani paasineqarput.
Nunatsinni tunillatsissimasut nutaat arfineq-marluusut marlunngornermi paasineqarsimasutut nalunaarutigineqarput.
Sisimiuni pingasut, Nuummi pingasut Tasiilamilu ataaseq paasineqarsimapput. Taamaasilluni suli tuniluuttoqarpoq.
Tunillatsissimasut misissortittut 326-t akornanni paasineqartut allassimavoq.
- Sisimiuni Tasiilamilu tunillatsissimasut tunillatsissimareersunut qanillivallaarsimasuusut paasineqarpoq, nunatta nakorsaaneqarfia kisitsisinik nutaanik nalunaaruteqarnermini ilisimatitsivoq.
Nuummi tunillatsissimasut nutaat, tunillatsereersimasunut qanillivallaarsimasuunersut ilisimatitsissutigineqanngilaq.
Ullut kingulliit marluk tunillatsittoqarsimanngitsoq nunatta nakorsaaneqarfiata nalunaarutigisarpaa. Tassungali peqqutaaqataavoq sapaatip akunnerata naanerani misissortittut ikinnerusarsimaneri.
Peqqissisut
Tunillatsissimareerlutik peqqissisut arlaqarput. Nunatsinni tunillatsissimasut nalunaarsorneqarsimasut maanna 47-pput.
Maanna napparsimmavimmi uninngasoqanngilaq.
