Tunillatsissimasut nutaat 87-it sisamanngornermi paasineqartut

Nunatsinni Nakorsaaneqarfik ullut marluk ingerlaneranni tunillatsissimasut amerlassusaannik nun.gl-ikkut nutarterisimanngeriarluni, sisamanngornermi oqaluttuarisinnaalersimavaa nutaanik 87-inik tunillatsittoqarsimasoq. Nuummi innaallagissap qamittaqattaarnera pissutigalugu marlunngornermi pingasunngornermilu misissuisarfik matoqqasimavoq. Tunillatsissimasut 87-it misissortissimasut 2288-iusut akornanni nassaarineqarput.

Upernavimmi ataaseq, Ilulissani pingasut, Qasigiannguani 53-it, Maniitsumi ataaseq Nuummilu 29-tt tunillatsissimapput. Nunatsinni Nakorsaaneqarfik nun.gl-ikkut taamatut ilisimatitissuteqarpoq.

COVID-19-imik tunillatsissimasoq ataaseq Dronning Ingridip Napparsimmavissuata peruluttunut immikkoortortaqarfiani uninngavoq.

Ullormut kisitsisit saqqummiunneqartut malillugit ullumikkut tunillatseqqasut 309-nik amerlassuseqarput, taakkunannga 155-it Avannaata Kommunianeersuupput, 57-it Kommuni Qeqertalimmeersuullutik, pingasut Qeqqata Kommunianeersut 94-illu Kommuneqarfik Sermersuumeersuullutik. Kommuni Kujallermi suli tunillatsissimasoqanngilaq.

Sapaatip-akunnerani kingullermi tunillatsissimasut amerlassusaat

Sapaatip-akunnerani 47-mi Kalaallit Nunaanni tamarmi tunillatsissimasut nutaat 268-it nassaarineqarput.

Sapaatip-akunnerani 47-mi Kalaallit Nunaannit tunillatsissimasut ataatsimut isigalugit amerlisimapput. Sapaatip-akunnerani 46-mi innuttaasut 100.000-iugaangata 263-it tunillatsissimasarlutik, sapaatillu-akunnerani 47-mi innuttaasut 100.000-iugaangata 473-it tunillatsissimasarlutik.

Tamanna pingaartumik Upernavimmi tuniluuttoqarneranik pissuteqarpoq, innuttaasummi amerlasuut tunillatsissimagamik.

Sapaatip-akunnerani 46-mi aamma Qasigiannguani inuit ilaat tunillatsissimapput, taakku Upernavimmeersunit tunillatsissimallutik. Tamatumalu kingorna Qasigiannguani tuniluuttoqangaatsialersimalluni.

Ilulissani tuniluuttoqarsinnaanera annertuumik ukkatarineqartoq

Upernavimmi tuniluuttoqaneranit aallaaveqartumik aamma Ilulissani tunillatsittoqarsimavoq. Sapaatillu akunnerani matumani allanik aamma tunillatsittoqarsimalluni, taamaammallu maanna Ilulissani tamatuma qanoq ingerlanera annertuumik eqqumaffigineqarpoq. Sumiiffinni allani aamma ataasiakkaanik tunillatsittoqarsimavoq Upernavimmi tuniluuttoqarneranik aallaaveqartumik.

Avannaata Kommuniani misissortissimasunit 1572-iusunit 11,3%-it tunillatsissimapput. Upernavimmi tunillatsissimasut nutaat 164-it nassaarineqarput, tassa assersuutigalugu inuit 100.00-iugaangata 14.708-t tunillatsissimallutik.

Nuummi tuniluuttoqarnera annikilliartortoq

Nuummit tunillatsissimasut nutaat 84-it nassaarineqarput, assersuutigalugu innuttaasut 100.000-iugaangata 436-t tunillatsissimasarlutik. Sapaatip akunnerisa marluk ingerlaneranni tunillatsittartut ikiliartorput. Sapaatip-akunnerani 45-mi inuit 100.000-iugaangata 773-it sapaatillu-akunnerani 46-mi inuit 100.000-iugaangata 664-it tunillatsissimallutik.

Sapaatip-akunnerani 47-mi Kommuneqarfik Sermersuumi 3.794-it misissortissimapput, taakku 2.2%-ii tunillatsissimallutik. Tamaasa ataatsimut isisalugit ajunngitsup tungaanut ingerlasoqarpoq, innuttaasut tuniluuttoqarnerata siammatsaalineqarneranut peqataalluarsimanerisa tamanna inerneraat.