Tunillatsissimasut nutaat 199-it
Coronamik tunillatsissimasut pingasunngornermi paasineqarput.
Nunatsinni Nakorsaaneqarfiup tunillatsissimasut amerlassusaannik nutarterisimanerani takuneqarsinnaavoq, pingasunngornermi misissortissimasunit 360-iusunit 199-it tunillatsissimasut.
Tassa misissortissimasut 55 procentii tunillatsissimapput.
Tunillatsissimasut amerlanersaat Avannaata Kommuniani nassaarineqarput, misissortissimasunit 143-usunit 102-t tunillatsissimagamik.
Kommuneqarfik Sermersuumi taamatut amerlatigingajattut misissorneqarsimapput, 45-innaalli tunillatsissimallutik.
Tunillatsissimasut amerlassusaat allanngortinneqarsinnaaput, PCR atorlugu misissuinissamut innuttaasut killeqartut kisimik misissortinnissamut neqeroorfigineqarsinnaammata.
Pingasunngornermi misissortissimasut amerlassusaat ullup siulianut sanilliullugu amerlanerupput, ullup siuliani misissortissimasut 254-iugamik.
Nunatsinni Nakorsaaneqarfiup kisitsisit pillugit paasissutissat amerlanerusut ullup ingerlanerani kingusinnerusukkut saqqummiutissavai, taammalu ilanngutassiaq manna aamma nutarterneqarumaarluni.
