Tunillatsissimasut marlunngorput: Nuuk matuneqarpoq - sumiiffippassuit matuneqarput

Inuk pineqartoq Nuummi najugaqarpoq, illoqarfimmilu allanik tunillaasimasinnaalluni, Kim Kielsen ilisimatitsivoq.

Taamaammat upalungaarsimaneq ualeru sisamanut allartinneqassaaq, tassani Tuniluuttumik nappaalasoqarnerani ataatsimiititaliaq aaqqissuussanik inerteqquteqarneq inuillu qulinik amerlanerusut katersuuttannginnissaanik piumasaqaateqarneq pillugit saqqummiussissaaq. Tassa illup iluani silamiluunniit aaqqissuussanut tamanna aamma atuuppoq.

Inerteqqussut Nuummiinnaq atuutissaaq, sapaatillu akinnerini pingasuni atuutissalluni.

Nuummi Nuuk centeri, diskotekit, imerniartarfiit timersortarfiillu, tassunga ilanngullugit timigissartarfiit matuneqassapput. Nuummi neriniartarfinnut cafeenullu isertoqaqqusaanngilaq. Illumiit annissassanik pajuttarnerit suli inerteqqutaanngillat. Nuummiit angallannerit suulluunniit, tassunga ilanngullugit nammineq angallammik angalanerit inerteqqutaalerput.

Nuummi ilinniarfeqarfiit tamarmik taamatuttaaq pisortat namminersortullu ulluunerani paaqqinnittarfii matuneqassapput. Pinasuartumik paaqqutarinninnissat aaqqissuunneqarput. Atuarfiit matuneqarnissaat aqangumiit atuuttussanngortinneqarpoq.

Ulluinarni nioqqutissanik pisiniarfiit nalinginnaasumik ammaannarput. Pisisartulli 2 meterinik imminnut ungasitsigisassapput.

Nuummut timmisartortarneq ullumimiit unitsinneqarpoq

- Uippallilissanngilagut, Kim Kielsen erseqqissaavoq.

Illoqarfiit allat nunaqarfiillu qulaani pineqartunut ilaatinneqanngillat.

Oqartussanit aamma timmisartut Nuummiit ualeru nalunaaqutaq sisamat kingorna aallartussat unitsinneqarput. Taamaalilluni Nuuk matuinneqarpoq.

Air Greenlandi tusagassiortunik katersortsinerup kinguninnguatigut ilisimatitsivoq, Nuummiit ilaasunik angallassinissat tamarmik ingerlaannartumik unitsinneqartut.

Nunatsinni Nakorsaaneq

Nunatsinni Nakorsaanerup ilisimatitsissutigaa, tunillatsissimasoq nutaaq ataasiinnaq matumani pineqartoq.

- Pineqartorli kimit tunillatsissimanersoq erseqqissumik paasineqanngilaq. Tamanna isumaqarpoq, inuiaqatigiinni tuniluuttoqalersinnaasoq. Tuniluuttoqalersinnaanera pinaveersaarniarlugu suliniutit taakku tamaasa aallartippagut. Tuniluuttoqavittoqannginnera atuutsiinnarniarsarisiuk. Tuniluuttoqalivissinnaanera pinaveersaartinniarlugu pinngitsoortinniarlugulu taaatut iliuuseqarpugut.

- Ilisimatusarfimmi pisoq pisimavoq. Inuit ilisimatuarfimmut attaveqarsimasut tamarmik ippigisaqalernissartik immikkut eqqumaffigissavaat. Maani Nuummi misissugassanik tigusisarnerput ingerlatiinnassavarput. Tunillatsissimasinnaasut tamaasa nassaariniarsarivavut. Danmarkimisut inissisimanngilagut. Suli naatsorsuutigaarput tuniluuttumik unitsitsisinnaalluta. Periarfissagissaarpugullu, tuniluuttoqalivinnginnerani siusissukkut iliuuseqajaarnerput pissutigalugu, Henrik L. Hansen oqarpoq.

Danmarkimit angerlarsiasorpassuit

Ajorluinnartumik pisoqassanngippat pisariaqarluinnarpoq, oqartussat inerteqqutaannik inassuteqaataannillu malinninnissaq.

- Ulluni kingullerni Danmarkimiit angerlartorpassuaqarsimavoq. Pingaaruteqarluinnarpoq inuit taakkua malittarisassatut atuutsilikkavut malillugit iliuuseqartarnissaat, Nunatsinni Nakorsaaneq oqarpoq.

Nuup avataani illoqarfinnut allanut nunaqarfinnulu tamanut immikkut kaammattuuteqarpoq. Tassalu Nuummisut pisoqarsinnaanera pinngitsoortinniarlugu inassuteqaatisinnik malinnigitsi.

Ujaasinerit

Nunatsinni Nakorsaaneq ilisimatitsivoq, politiit ikiortigalugit tunillanneqarsimasup inuit attaveqarfigisimasai ujartorneqaleruttortut.

- Inuit inummik tunillatsissimasumik attaveqarsimasut attaveqarfiginiarsaralugit isumalluuterpassuit atorlugit ulapittoqarpoq. Qujanartumilli politiit tamanna nalinginnaasumik suliarisarpaat, Bjørn Tegner Bay ilisimatitsivoq.