Tunillatsissimasut ikiliartortut
Nunatsinni Nakorsaaneqarfiup ullumikkut coronaqartut amerlassusaat saqqummiussimavaa, coronaqartut ippassamut sanilliullugu 30-niit 25-nut ikilisimapput.
Ulluni arlalinni nutaanik tunillatsittoqartareersoq tuniluunnerup unikkiartornissaa neriuutigineqarsinnaavoq.
Kommunini pingasuusuni taamaallaat maanna tunillatsissimasoqalerpoq: Qeqqata Kommuniani pingasut, Kommuneqarfik Sermersuumi aqqaneq-marluk) Kommuni Kujallermilu qulit.
Nuummi Kangaamiunilu innuttaasunik ippassaq misissuisaqattaartoqareersoq, nutaanik tunillatsittoqarsimaneranik suli nalunaaruteqartoqanngilaq.
Inuit akiuussutissalertissimasut 33.165-iusut naatsorsorneqarsimavoq, 19.307-illu tamakkiisumik akiuussutissalerneqarsimallutik.
Nalunaaqutaq 13.00 tusagassiortunik katersortitsisoqassaaq, tassani naatsorsuutigineqarpoq nunatta nakorsaanerata coronap qanoq maanna atugaatiginera oqaluttuarissagaa, corona nunarsuarmi tuniluutilermalli marlunngormat nunatsinni tunillatsissimasut aatsaat taamak amerlatigipput.