Tunillatsissimasut arfineq-pingasut nutaat - meeraaqqerivimmik matusineq
Covid-19-imik tunillatsissimasut arfineq-pingasut pingasunngornermi unnukkut Aasianni Upernavimmilu paasineqarput. Aasianni meeraaqqerivik nalunartut pillugit matuneqarpoq.
Aasianni tunillatsissimasut nutaat arfineq-marluupput. Taakkunannga tallimat inoqutigiinni ataatsineersuupput. Inoqutigiinni nukerlequt unnuaq aatsaat ersiuteqalersimammat ippassaq meeraaqqerivimmiissimavoq.
Nalunartut pillugit kommune attavigineqarpoq meeraaqqeriviup matuneqarnissaa kiisalu pisut pillugit meeraaqqerivimmiittuutillit angajoqqaat ilisimatinneqarnissaat qulakkeerniarlugu, oqartussat paasissutissiipput.
Tunillatsissimasuni arfineq-pingasuusuni ataaseq Upernavimmi tunillatsittoq paasineqarpoq. Upernavimmi tunillatsissimasoq tunillatsissimasunut ilisimaneqareersunut qanittumik attaveqarsimavoq, taamaammallu misissuisoqarnerani angerlarsimaannartooreerluni. Tunillanneqarsimasoq taanna maanna mattusimalereerpoq.
Namminersorlutik Oqartussat tusagassiuutinut nalunaarumminni allapput.
Tuniluunnerup paasiniarnera
Tunillatsissimasut kingulliit pillugit tuniluunnerup aallaavia maanna paasiniarneqaleruttorpoq. Tunillatsissimasut tamarmik angerlarsimaffimminni mattusimapput.
- Tunillatsissimasunik qanimut attaveqarsimasut tamarmik corona pillugu allatseqarfimmiit sianerfigineqarumaarput, ullunilu arfineq marlunni angerlarsimaannarnissaannik peqquneqarlutik, ullullu arfineq marluk qaangiunneranni misissorteqquneqarlutik, oqartussat paasissutissiipput.
Taassumallu saniatigut qanimut attaveqarsimasut ulluni 14-ini ersiuteqarnerlutik maluginiassagaat paasissutissiissutigineqarpoq.
Ullut arfineq marlussaanni misissortinnermi tunillatsissimanngitsutut inerneqaraluarpalluunniit mianersornissaq suli atuutissasoqq, ersiuteqalernerlunilu eqqumaffigeqquneqarput.
Aasianni tunillatseqqasut katillugit maanna 11-iupput.
Eqqaamajuk:
Killilimmik angalaarnissamik aamma qanimut attaveqarnerit sapinngisamik ikittuinnaatinneqarnissaannik kikkulluunniit kaammattorneqarput Peqatigitillugu kikkut tamarmik ersiutaasinnaasunik eqqumaffiginninnissaat kaammattuutigineqarpoq, nalinginnaasumillu siunnersuutit eqqaamallugit:
- Ersiuteqaruit tunillatsissimasumilluunniit qanimut attaveqarsimaguit angerlarsimaannarit aamma misissortigit
- Errortukulagit assanulluunniit bakteriaajaat (håndsprit) atortaruk.
- Tangajoruit quersoruilluunniit talinnik asseruk.
- Allanut qanittumik attaveqarnaveersaarit
- Eqqiluisaarneq silaannarissaaneq eqqumaffigiuk - angerlarsimaffimmi aammali suliffinni
- Qanillinaveersaarit allallu taamatut ilioqqullugit.