Skip to main content

Tunillatsissimasut amerlinngillat - sinerissami misissuisoqarnerulissaaq

Kalaallit Nunaanni allanik tunillatsissimasunik nassaartoqanngitsoq, tusagassiortunik ullumi katersortitsinermi ilisimatitsissutigineqarpoq. Sinerissami coronamik tunillatsissimasoqarnersoq paasiniarlugu misissuinerit amerlineqassapput.

Attaveqatigiinnermut Naalakkersuisoq Karl Frederik Danielsen innuttaasunut paasissutissiissalluni ​​​​​tusagassiortunik sapaammi katersortitsivoq.

- Ullumi nutaarsiassaq tassaavoq, misissugassat 40-t akissutisimavagut, taakkulu tamarmik tunillatsissimanngillat. Nutaarsiassaq nuannersoq, Karl Frederik Danielsen oqarpoq.

Nunatta nakorsaanera Henrik L. Hansen itisiliivoq:

- Qujanartumik tunillatsissimasunik nutaanik nassaanngilagut. Misissugassat tallimanngormat tigusimasagut akissutisivagut. Misissugassat 43-t suliarisimavagut, taakkunannga Nuummeersut amerlanersaallutik, nakorsaaneq oqarpoq.

- Timmisartut angalatitsinerisa unitsinneqarneranit sapaatip akunnera qaangiuttorlu misissugassat tiguneqarsimapput. Tunillatsittoqarsimasunik nassaarnissarput naatsorsuutigisinnaasimagaluarparput. Taamaattumik nuannerpoq qulakkiingajalluinnarlugu oqarsinnaaleratta, Nuummi annertunerusumik tunillaassortoqalernissaanut ilimanaat annikilleriarmat. Sulili tunillaassortoqarpoq. Taamaammat maleruaqqusat malinnissaat aalajangiisuulissaaq. Suli toqqissisimalivinngilagut.

Sinerissami misissuisoqarnerulissaaq

- Sinerissami misissugassat 100-t tiguneqarsimapput. Timmisartullu angallakkunnaarnerannit sapaatip akunnerata qaangiunnerani tunillatsissimasumik suli nassaannginnerput ajunngilluinnarpoq. Sapaatip akunneranit tullermit nakkutiginninnerput annertusissavarput. Timmisartuussinerit nalinginnaasut unitsinnerannit ullut 14-it qaangiutsinnagit, sinerissami tunillaassortoqalernissaanut suli aarlerinartoqarpoq. Taamaammat misissugassanik katersinerulerniarpugut.

- Tunillatsissimasunik nassaassagutta, tunillaassornerup siaruannginnissaanut iliuuseqapallassaagut, nunatta nakorsaanera oqarpoq.

- Ataatsimut isigalugu ingerlalluarpugut, maanna eqqarsaatigilertariaqarparput avammut qanoq ammarniaqqissanerluta. Tamannali pillugu oqaaseqarnissatsinnut suli siusippallaarpoq, oqarpoq erseqqissarlugulu nunarsuup sinnerani ineriartorneq apeqqutaasoq.

Chefpolitiinspektør Svend Foldager ilisimatitsivoq silarlunnerani angerlarsimaffinni eqqissiviilliornerit ikinnerusimasut.

Imigassamik tuniniaajunnaarneq pillugu oqaaseqanngitsut

Karl Frederik Danielsen ilisimatitsivoq imigassamik tuniniaanissap inerteqqutaalernera pillugu oqaaseqarumanani.

Naalakkersuisut siulittaasuat Kim Kielsen ilisimatitsisimavoq tusagassiortunik ataasinngornermi katersortitsileruni Nuummi, Kapisilinni Qeqertarsuatsiaanilu imigassamik tuniniaanerup inerteqqutaalernera pillugu oqaaseqassalluni.

Nunatta nakorsaanera:

- Imigassartorunnaarnermi kingunerlutsitsisoqassappat, taava peqqinnissaqarfimmut saaffiginnittoqassaaq. Imigassartorunnaarnermi taama pisoqarsinnaanera eqqumaffigaarput, Henrik L. Hansen nassuiaavoq.

Chefpolitiinspektøren:

- Imigassanik tuniniaaniartoqalernissaa eqqumaffigaarput, sakkortuumillu qisuariarfigissavarput. Taama iliortut akiligassitsissinnaapput, Svend Foldager oqarpoq.

Ammasarnerit amerlanerusut

- Aqutsisoqatigiit ataasinngorpat misissussavaat påskep ulluini pisiniarfiit sivisunermik ammatinneqarsinnaanersut, ullullu amerlanerusut ammatinneqarsinnaanersut, pisiniat ataatsikkuunnginnissaat anguniarlugu, nakorsaaneq ilisimatitsivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER