Tunillatsissimasoq nutaaq Ilulissani paasineqarpoq

Ilulissani innuttaasoq ataaseq coronavirusimik tunillatsissimavoq. Nunatsinni Nakorsaaneq Henrik L. Hansen pingasunngornermi ullup-qeqqanut tusagassiortunik katersortitsinermit taamatut ilisimatitsivoqg.

- Coronamik tunillatseqqittoqarsimasoq paasivarput.

- Tamatumuuna Ilulissanit tunillatsittoqarsimavoq. Pineqartoq tikinnerminiit ullut tallimat qaangiummata misissortissimavoq. Misissortinnerminilu tunillatsissimasoq paasineqarpoq, Henrik L. Hansen oqaluttuarpoq.

- Pineqartoq aallannginnermini malittarisassat maleqqinnaarlugit misissortissimavoq, tassanilu tunillatsissimaneranik takussutissaqarani, nunatsinni nakorsaaneq oqarpoq.

Tunillatsissimasoq mittarfinnik sanaartornermik suliaqartuneersuusoq

- Pineqartoq ajunngilaq, tunillanneqarsimasinnaasullu paasiniarlugit misissuileruttorpugut. Tamanna politiit suleqatigalugit ingerlanneqarpoq, qulakkiissavarpulli pineqartup attaveqarfigisimasaasa angerlarsimaffimminni mattuteqqanissaat.

- Inuit mittarfinnik snaartonermik suliaqartuneersuupput. Taakkulu amerlavallaaratik.

- Pisoq ernummatiginngilarput. Qularinngilluinnarpara tuniluunneq siammatsaalisinnaallutigu, Henrik L. Hansen oqarpoq.

Ilulissat matuneqassanngitsoq

Naalakkersuisut Siulittaasuata oqaatigaa, tunillatsittoqarsimammat imaanngitsoq Ilulissat matuneqassasut:

- Aatsaat tuniluunnerup siaruaatinnginnissaa qulakkeersinnaanngikkutsigu matusisoqarsinnaavoq. Illoqarfinni tamani qanoq iliuuseqartoqarnissaanut pilersaaruteqarpoq, Kim Kielsen oqarpoq. Taassuma suli naatsorsuutigaa, imarpik qulaallugu timmisartuussisarnerup pilersaarutit malillugit juunip 15-iani ammaqqinneqarnissaa.

Maajip 19-iani Kalaallit Nunaannukartoq

Nunatsinni Nakorsaanerup oqaluttuaraa, pineqartoq majip 19-iani Kalaallit Nunaannut tikissimasoq.

- Timmisartoqarfinni assigiinngitsunik periuseqarluni sulisoqaraluartq, imminnut qanillinaveersaarnissaat pingaaruteqarnerpaavoq, nunatsinni nakorsaaneq oqarpoq.

- Pineqartoq nappaatip malunniutaanik ippigisaqarsimanngilaq. Pineqartup angalanermini tunillaassuisimanissaa ilimananngilluinnarpoq, Henrik L. Hansen oqarpoq.

Pineqartoq nunami maani maajip 25-ani misissortissimavoq.

- Tamatuma kingorna misissugassatut tigusaq Nuummut nassiunneqarpoq, ullumilu laboratooriami misissorneqarsimalluni. Sineriammi misissugassatut tigusat inernerisa paasineqarnissaannut ullut marluk ingerlasinnaapput, Henrik L. Hansen nassuiaavoq.

- Taamatut assartuisarneq pinaveersaarniarlugu, sineriammi misissuisoqarsinnaanera sulissutigaarput.

- Taamaammat maskiinat misissuutissat immikkut tallimat inniminnersimavavut, kim Kielsen tapersiilluni oqarpoq.

Piffissap sivikitsunnguup ingerlanerani tunillatsissimasut marluk

Piffissami sivisuumi tunillatsittoqarsimanani sapaatiummat unnukkut saqqummiunneqarpoq, Aasianni innuttaasoq ataaseq coronavirusimik tunillatsissimasoq.

Innuttaasoq Danmarkimi ilaatigut coronavirusimik nappaateqarsimasoq, sapaatip akunnerani kingullermi sisamanngornikkut Kalaallit Nunaannut uterluni tikippoq.

Pineqartorli Kalaallit Nunaannut allartinnani marloriarluni misissortissimavoq, taakkunanilu tunillatsissimaneranik takussutissaqarani. Kalaallit Nunaannut tikimmat misissoqqinneqarsimavoq, coronavirusimillu tunillatsissimammat angerlarsimaffimmi mattussaaqqatinneqarluni.

Nunatsinni Nakorsaanerup tassunga atatillugu oqaatigaa, nunap ammaqqikkiartuaarnera ilutigalugu coronap Kalaallit Nunaanni tuniluutilernissaa ilimanarsinnaasoq. Nunatsinnili nakorsaaneq isumaqarpoq, peqqinnissaqarfik tuniluuttoqaqqilersinnaaneranut piareeqqasoq.