Tuluit Nunaat Norgep avannaani Issittumi sakkutooqarfimmik nutaamik pilersitsivoq
Tuluit Nunaata Issittumi sakkutooqarnikkut suliaqarnini Norgemi Tromsøp kujataani sakkutooqarfiliornikkut nukittorsarpaa.
Issittumi sakkutooqarfiup nutaap tuluit sakkutuui ukiuni qulini tulliuttuni tapersersussavai. Tuluit sakkutuui imarsiortut Royal Navy nittartakkamini marlunngornermi taama nalunaaruteqarput.
Sakkutooqarfik Camp Vikingimi taaguuteqarpoq, taassumalu Tuluit Nunaata avannaani isumannaallisaanermik suliaqarneranik naqissusiissaaq.
- Camp Viking Norgep avannaani pilersinneqaqqammersoq Royal Marines Commandomut qitiusumik inissisimassaaq, taakkumi issittumi Tuluit Nunaata sakkutuunik issittumi pisariaqartitsinermini attaveqartarfigimmagit, Royal Navy allappoq.
Sakkutooqarfik ukiuunerani tulunnik sakkutuunik 1.000-nik inoqarpoq, Tromsøp kujataanilu kujammut 120 kilometerisut ungasissusilimmi Norgemiut illersornissaqarfiata eqqaaniippoq.
NATO-p avannaaniittuinut illersueqataassasoq
- Sakkutooqarfiup inissisimanera nunap immikkoortuani aarlerinartoqarnissaanut illersuiffiulluarsinnaavoq, Tuluit Nunaat taamaalilluni NATO-mi avannarpasissumiittut illersorneqarnissamik pisariaqartitsilerpata sukkasuumik qisuariarsinnaassaaq, Royal Navy allappoq.
Camp Viking tuluit ssakkutuuisa avannaani 'angerlarsimaffigigaat', major Kirk Allen oqarpoq:
- Ukiuni qulini tulliuttuni 'Camp Viking' qaqqani issittumilu sorsunnermut sungiusarnermut qitiusoqarfiussaaq, taannalu NATO-p suliaqarnerinut periusissaqarfittut inissisimavoq.
Tuluit Nunaannit sakkutooqarfiup nutaap nalunaarutigineqarnera, piffissami Issittup eqqissisimaffiunissaata ajornakusooriartorfiani pivoq. Ruslandip Ukrainemut saassussinera pissutigalugu Nunat Killiit Ruslandillu akornanni eqqissiviillioriartorneq annertusivoq, tamannalu ilaatigut Ruslandip Issitumi Siunnersuisoqatigiinni suleqatigineqarnerata unitsikkallarneranik kinguneqarpoq.