Tuluit Nunaannut niuernikkut isumaqatigiissuteqartoqarnissaa neriuutigaa
Nunanut allanut naalakkersuisup Steen Lyngep Tuluit Nunaannik ukiaru niuernikkut isumaqatigiissusiorsinnaanissaq neriuutigaa
Nunanut allanut naalakkersuisup Steen Lyngep Tuluit Nunaannut imaluunniit Tuluit Kunngeqarfiannut niuernermut isumaqatigiissutissamut missingersuutip siulliup septembarimi tunniunnissaa naatsorsuutigaa.
Suliarineqarnerali sivisuvoq, aviisi Sermitsiaq allappoq.
- Tuluit Nunaata EU-mit aninerata kingorna niuernikkut isumaqatigiissusiorniarneq qanoq ingerlava?
– Kunngeqarfimmut tassunga aamma Irlandimut Avannarlermut niuernikkut isumaqatigiissutissamut missingersuusiorneq siuariartorpoq. Suliarineranut atatillugu tusarniaasoqarmat aamma sulisartoqarnermi illuatungeriinnit peqataaffigineqartumik, tassaasumik neriuutigineqartutut niuernikkut isumaqatigiissutissatut missingersuummik siusinaarluni tusarniaassutigineqartumik. Tusarniaasoqarnerata kingorna atorfilittatta missingersuut massakkut naleqqussarpaat, missingersuummullu ilanngussassanik suliaqarlutik, Steen Lynge Sermitsiamut oqarpoq.
- Tamanna naammassineqarpat, neriuutiginartumik missingersuut kingullerpaamik tusarniaassutigineqassaaq, tamatumani nunanut allanut ministeeriaqarfik ilanngullugu tusarniarneqassalluni. Tamatuma kingorna neriuutigaarput missingersuut naammassineqangajalissasoq, iluarsisassallu iluarsineqareerpata, Tuluit Nunaannut nassiunneqannginnerani akuerisassanngorlugu Naalakkersuisunut saqqummiunneqassalluni. Missingersuutip Tuluit Nunaannut septembarimi tunniunneqarnissaa neriuutigaarput, Steen Lynge ilisimatitsivoq nangillunilu:
- Atorfilittanit suliarineqarnerani isumaqarpugut aallaqqaammut takusinnaasatsitut niuernikkut isumaqatigiissutissami killiliussatut tunngavigineqartuni maannakkut niuernikkut isumaqatigiissutitsinni tunngaviusut aallaavigineqartut, taakkulu Tuluit atorfilittaannut nassiunneqarlutik. Taakku tiguneqareersut Tulunnit uppernarsarneqarpoq.
Aviisimi Sermitsiami, uani pissarsiarisinnaasarni, atuarnerusinnaavutit: