Tuluit Nunaannut isumaqatigiinniarnerit aallartissinnaanngulersut
Ataatsimiinnerit oqaloqatigiinnerillu ukiuni arlalinni ingerlanneqareersullu Tuluit Nunaat Kalaallit Nunaannut killilersugaanngitsumik niueqatigiinnissamut isumaqatigiissutissap pisortatigoortumik isumaqatigiinniutigineqarnissaanut piareerpoq.
Københavnimi Tuluit Nunaata aallartitaqarfiata aamma Naalakkersuisut Siulittaasuata Múte Bourup Egedep sisamanngornermi januaarip 27-ani ataatsimeeqatigiinnerisa kingorna Naalakkersuisut paasissutissiipput, illugiilluni killilersugaanngitsumik niueqatigiinnissaq pillugu Tuluit Nunaata aamma Kalaallit Nunaata akornanni isumaqatigiinniarnerit aallartissinnaanngortu.
- Tuluit Nunaata Kalaallit Nunaatalu akornanni niueqatigiinneq nunanut taakkununnga aningaasanik isaatitsissutaallunilu suliffissaqartitsisimavoq. Taamaattumik nuannaarutigaarput niueqatigiinnermi aningaasarsiornikkut attaveqaataasut ingerlaqqinnissaata qulakkeerneqarnissaannut suliamik ingerlatsisinnaagatta, Naalakkersuisut Siulittaasuat Múte B. Egede ataatsimiinnerup kingorna oqarpoq.
Isumaqatigiissutip siunertaraa Tuluit Nunaata kalaallit aalisakkanik qalerualinnillu tunisassiaasa tunisassiat Tuluit Nunaannut eqqunneqarnerini akitsuutaasa annikillilernissaat imaluunniit peerneqarnissaat.
Tuluit Nunaata EU-mut ilaasortaajunnaarnissaa paasinarsimmalli nunat taakkua marluk akornanni pisortatigoortuunngitsumiunerusoq oqaloqatigiinnerit ingerlanneqarsimapput. Maannali Tuluit Nunaat isumaqatigiissutissamut piumasaqaatiminik missingiummik tigussaasumik saqqummiussinissamut piareerpoq, soorluttaaq Kalaallit Nunaat niueqatigiinnermut isumaqatigiissutissamut missingiummik Tuluit Nunaannut 2020-mi nassiussisimasoq.
Ukioq manna isumaqatigiissuteqarnissaq isumalluarfigineqartoq
Maanna isummanik saqqummiussinissamut piareersartoqartussanngorpoq, isumaqatigiinniarnerit qanoq ingerlanneqarnissaannut najoqqutassat illuatungeriinnit ilisimaneqarsinnaaqqullugit, taavalu piffissami aggersumik atorfilittatigut isumaqatigiinniarnerit pimoorullugit aallartissinnaanngussallutik qaammammut ataasiarluni ataatsimeeqatigiittarluni.
Taama Nunanut Allanut Naalakkersuisoqarfimmi naalakkersuisoqarfiup pisortaa, Mininnguaq Kleist, isumaalluarnissamut tunngavissaqarneranik isumaqartoq, paasissutissiivoq.
- Taakkua missingiutaannik siunissami qaninnermi tigusaqarutta immitsinnnut ungasippallaannginnissarput immaqalu ukioq manna isumaqatigiissuteqarsinnaanissarput neriuutigisinnaavarput. Isumaqatigiinniarnerilli taama ittut aamma sivisunaarsinnaapput, naalakkersuisoqarfiup pisortaa Sermitsiaq.AG-mut oqarpoq.
Tuluit Nunaata Kalaallit Nunaatalu akornanni illugiilluni killilersugaanngitsumik niueqatigiinnissamik isumaqatigiissut Kalaallit Nunaata niueqatigiinnikkut isumaqatigiissutaasa siullersarissavaat.