Tuluit Kalaallit Nunaannut tunngatillugu ataatsimiititaliamik pilersitsisut

Tuluit Nunaanni inatsisartut ataatsimiititaliamik, nunap Kalaallit Nunaannut attaveqartarneranik nukitttorsaasussamik Inatsisatunillu suleqateqarnermik pitsanngorsaasussamik pilersitsisimapput.

Tuluit Nunaanni inatsisartut Kalaallit Nunaannut tunngatillugu APPG-mik taaneartartumik pilersitsisimapput. Taanna ataatsimiititaliaavoq inatsisartuni partiinit tamanit politikkerinik inuttaqartoq.

Isumalioqatigiissitap Polar Research and Policy Initiativep (PRPI) tusagassiorfinnut nalunaarutaa naapertorlugu, isumalioqatigiissitaq ataatsimiititaliamut allattoqarfissatut toqqarneqarsimavoq.

Isumalioqatigiissitap tusagassiorfinnut nalunaarummi oqaluttuaraa ataatsimiititaliamik pilersitsinermi anguniagaasoq, Kalaallit Nunaata Tuluillu Nunaata politikkikkut, aningaasaqarnikkut, isumaginninnikkut, kulturikkut ilisimatuussutsikkullu attaveqatigiittarnerisa nukittorsarneqarnissaat.

Ataatsimiititaliap aamma Tuluit Nunaanni Kalaallit Nunaannut tunngatillugu ilisimasaqarnerulernissaq suliaralugulu Inatsisartunik suleqateqarneq siuarsaaffigissavaa.

Siulittaasoq: Tamanna soqutiginninnerulernermik nassataqarsimavoq

Ataatsimiititaliami siulittaasuuvoq Brendan O'Hara, taanna Scottish National Party sinnerlugu inatsisartuni ilaasortaavoq:

- Ataatsimiititaliamik pilersitsisinnaasimanerput nuannaarutigeqaara, pilersitsinerlu Underhusimit tamanit soqutinninnerulersitsisimavoq, Brendan O´Hara oqarpoq, nangillunilu:

- Kalaallit Nunaat alutoriuaannarsimavara; oqaluttuassartaa inuttaalu kisiisa pinnagit, aammali nunap pingaarutilipilussuarmik inissisimasup nunarsuup sinneranut qanoq siunissami attaveqartarnissaminik takorluuisarnera. Ataatsimiititaliami siulittaasutut Inasisartut allallu suleqatigissavakka, tassani Kalaallit Nunaannut attaveqartarneq pitsaanerulersinniarlugu aamma nunap innuttaanik politikkianillu pitsaanerusumik paasinninnissaq anguniarlugu, siulittaasoq oqarpoq.

Kleist: Pitsaalluinnarpoq

Isumaqalioqatigiissitap PRPI-p tusagassiorfinnut nalunaarutaa naapertorlugu inatsisartut Danmarkimut Savalimmiunullu tunngatillugit ataatsimiititaliaqareerput, taamaalilluni ataatsimiititaliamik pilersitsinermi Tuluit Nunaata Kalaallit Nunaannut attaveqartarnerani nalornissutigineqartartut aaqqiiffigineqassapput.

Mininnguaq Kleistip, Kalaallit Nunaata EU-mi sinniisoqarfiani pisortap ataatsimiititaliaq nutaaq pillugu nutaarsiassaq nuannaarutigaa:

- Kalaallit Nunaannit niuernikkut, aalisarnikkut, ilisimatuussutsikkut il. il. Tuluit Nunaannut attaveqatigiittarnerup ineriartortinneqarnissaa soqutigineqarluinarpoq, Tuluillu Nunaanni inatsisarut tamatumunnga aamma soqutiginninnerat pitsaalluinnarpoq, Mininnguaq Kleist oqarpoq.

Kalaallit Nunaannit raajanik Tulit Nunaannut tunisaqartarneq qulakkeernairlugu, nunamik niuernikkut isumaqatigiissuteqarnissaq maannakkorpiaq sulissutigineqarpoq.

Powered by Labrador CMS