Tukumap angalaqqaarnera - nipaatsumik atsiisoqassaaq
Tukuma Arctica angalaqqaarnermini maanna Nuup tungaanut ingerlaarpoq
Royal Arctic Linep umiarsuartaarsua, Tukuma Arctica 179 meterinik takissuseqartoq, angalaqqaarnermini maanna Atlantikoq ikaarlugu Kalaallit Nunaata tungaanut ingerlaarpoq.
Tukuma Arctica Kalaallit Nunaannut angalaqqaarnermini Sisamanngornermi Illernartumi ullup-qeqqata siorna akunnialunnik kinguaattoorluni Aalborgimi Grønlandshavnimit aallarpoq. Tamanna pivoq silagissuugaa avannaq-kippasimmik suffarissoq.
Nuummut ingerlaarnermi Reykjavik aqqusaarneqassaaq, Tukuma Arcticalu Nuummut apriilip 16-iani unnukkut tikissangatinneqarluni.
Nuummi atserneqassasoq
- Umiarsuaq apriilip 17-iani matoqqasumik aaqqissuussinermi atserneqassaaq. Royal Arctic Linep erinarsoqatigiinnik erinarsortoqarluni, nipilersortoqarluni, kaffillerluni kaagillerlunilu allarpassuarnillu pisoqartitsilluni Nuummiunut tamanut ammasumik atsiinermik aaqqissuussinissaminik pilersaaruteqarsimagaluarnera corona pissutigalugu taamaatiinnarneqartoq, umiarsuaatileqatigiiffimmi attaveqaqatigiinnermut nittarsaassinermullu pisortaq, Ann-Britta A. Olsvig, paasissutissiisoq.
Tukuma Arctica marsip aallartinneraniilli Aalborgimiissimavoq piareersarneqarluni. Suliaq maanna naammassineqarsimalerpoq, containerillu siulliit pingasunngornermi unnukkut usilersuunneqarlutik. Tukuma Arctica tamakkiisumik usilersorneqarsimalluni containerinik isikkanik 20-nik takissusilinnik 2.150-inik usisinnaavoq.
Ingerlaaqatigiittalernissaq kinguartinneqartoq
Tukuma Arctica sananeqarnera Royal Arctic Linep Islandimi umiarsuaatileqatigiiffimmik Eimskipimik, umiarsuarnik assingusunik marlunnik Bruarfossimik aamma Dettifossimik, pigisaqartumik, ingerlaaqateqartalernissamik pilersaarutaanut ilaavoq. Umiarsuit taakkua pingasut Aarhus aallaavigalugu paarlakaajaallutik Kalaallit Nunaat pajuttortartussaavaat, coronali pissutigalugu ingerlaaqatigiittalernissaq kinguartinneqarluni.
- Qaqugu aallartinnissarput maannakkorpiaq oqaatigisinnaanngilarput, Ann-Britta A. Olsvig oqarpoq.
Ingerlaaqatigiittarneq aallartippat Aalborgimit Aarhus aqqusaarlugu Reykjavikimut tassanngaanniillu Nuummut paarlattuanillu sapaatip-akunneranut ataasiarluni angalasoqartalissaaq.