Skip to main content

Tukuma Arctica tippussaasimasoq

Tukuma Arctica Tórshavnimi nunniukkat marluk akornanni nikinneq ajuleqqavoq.

RAL-ip umiarsuaataata Tukuma Arcticap, pituutai unnuaq kittorarsimapput, maannalu Tórshavn-imi nunniugatoqqap nunniukkallu nutaap maanna sananeqartup akornanni nikinneq ajulersimalluni.

Sumiiffimmi suli anorersuarpoq, tamannalu pissutigalugu umiarsuaq suli inissinniarneqarsimanngilaq, Savalimmiuni aviisi Dimmaletting allappoq.

Ajoquserneqarsinnaasoq

- Ernumanarpoq, silali taamaatillugu pitsaanerpaavoq inissinniarnissaanut utaqqinissaq. Umiarsuaq qujanartumik putusimanngilaq. Anorikillinissaanut utaqqisariaqarpugut, Hentzar Steingrímsson Royal Arctic Linep tuniniaasartuani, Tor Shippingimi pisortaq Savalimmiuni aviisimut oqarpoq.

Tukuma Arctica tallimanngormat unnukkut anoersualeruttortoq Islandimi Reydarfjordurimiit Tórshavnimut tikippoq. Angallammit kalitsinnissaq inniminnerneqarsimavoq, umiarsuarli talitsinniarlugu kalittaatit marluk atorneqartariaqarsimapput.

Usigiaanissaq taamaatiinnarneqartoq

Anorersuarnera pissutigalugu usigiaanissaq taamaatiinnarneqarsimavoq – usigiaanissaq arfininngornerup ullaavani pisussatut pilersaarutaagaluarpoq.

- Unnuap-qeqqalivissoq pituutai kittorarput. Siullermik siuata tungaaniittut kingusinnerusukkullu aqata tungaaniittut, Tukuma Arcticalu sanguvoq, nunniugatoqqallu aamma maanna nunniorlugu suliarineqartup akornanni betonimut aporluni nikinneq ajulersimalluni. Umiarsuup naalagaa qanoq iliuuseqarsinnaasimanngilaq, takunnissimasoq Sermitsiaq.AG.mit oqaloqatigineqartoq oqarpoq.

Aqqartartut misissuinissaat utaqqineqartoq

Havnen i Tórshavnimi umiarsualivik 14 meterinik itissuseqarpoq, taamaammallu Tukuma Arcticap 8,6 meterinik itsinertussuseqartup inissinniarneqarnissaa ajornarnaviarani.

Tórshavnimi sila atoruminarsiartulissasoq oqaatigineqarsimavoq. 

Royal Arctic Linep tusagassiorfinnut nalunaaruteqarnermi ilisimatitsissutigaa, sila atoruminarseriarpat umiarsuaq aqqartartumit misissorneqassasoq ajoqusersimanersoq nalilersuiffigineqassalluni. Tamatumalu sapaatip ingerlanerani pisinnaanissaa naatsorsuutigineqartoq.

Umiarsuaq arfinngornerup ullaavani Aarhusiliarluni aallartussaangaluarpoq, pisimasorli pissutigalugu kinguaattuussalluni.

- Nassiussanik tigusisussat pisumit eqqorneqartut nassiussat qaqugukkut tunniunneqarnissaat pillugu ataasinngorpat ilisimatinneqarumaarput, Royal Arctic Line allappoq.

Sermitsiaq.AG-mit pisoq malinnaaffigineqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER