Tuka Tysklandimi: Asannilerama nuuppunga
Tuka Berg Lynge Nuummeersoq Tysklandip kujasinnerusortaani maanna najugaqarpoq. Asannilerami nuussimavoq.
Asanninneq!
Akissut ersarilluinnartoq naatsunnguarlu 56-inik ukiullip Tuka Berg Lyngep oqaatigaa aperineqarami sooq Tysklandimi – Freiburg Im Breisgau-imi – maanna najugaqalersimanerluni.
Illoqarfik Tysklandip kujasissortaaniippoq, Frankrigip Schweizillu killeqarfianut qanittumiilluni. Tassani 56-inik ukiulik Tuka Berg Lynge ukiuni sisamani affarmilu kingullerni najugaqareerpoq. Taassuma siuliani Danmarkimi ukiuni 24-ni najugaqarsimavoq. Radiolerisuusimasoq nipilersortartorlu Nuummeersoq biilinik ingerlatsisutut ataatatullu angerlarsimasutut maanna inuuniuteqarluni oqaluttuarpoq.
Akit appasittut
Asanninneq tamanit pingaarnerpaavoq, Tysklandimili najugaqarnermi allanik aamma iluaquteqarpoq. Tukap erseqqissarpaa Tysklandimi inuuniarnikkut akit Kalaallit Nunaannit appasinnerujussuusut – pingaartumik akitsuutinik qaffaasoqareernerata kingorna.
Tysklandimi akit appasipput, Nutella 800 grammi 5€-lerlugu, tassa 40 koruunilerlugu pisiarineqarsinnaavoq – immiaaraq liiterip affaa neriniartarfimmi 3,50€-lerlugu – tassa 30 koruunit ataallugit – aamma pisiarineqarsinnaavoq.
Tukap pinngortitaq aamma nuannaraa, pinngortitami qaqqarsuaqarpoq orpippassuaqarlunilu Schwarzwaldimik taaneqartartumik.
Oqaatsinik ilikkarnissamut ajornartorsiuteqarsimanngisaannarpoq – Kalaallit Nunaannullu angerlarnissaminut pilersaaruteqarani, naak pinngortitaq ikinngutillu maqaasinarsinnaagaluartut.