Tuaviuullugu inatsisiliaq sivitsorneqassasoq
Nappaatit tunillaassuuttut akiorniarlugit iliuutsit pillugit Inatsisartut peqqussutaat 2020-mi apriilip qaammataani suliaripallallugu allanngortinneqarsimasoq, ukiup affaanik sivitsorlugu atuutsinneqarnissaa siunertaralugu Inatsisartuni suliarineqarsimavoq.
Inatsisartut ukiaq manna Nappaatit tunillaassuuttut akiorniarlugit iliuutsit pillugit Inatsisartut peqqussutaat - nappaatit tunillaassuuttut pillugit inatsimmik taaneqartartoq innuttaasut angalasinnaanerannik kiffaanngissuseqarnerannillu killiliinissamut Naalakkersuisunut pisinaatitsisoq suliarissavaat.
Siunnersuut sisamanngornermi siullermeerlugu suliarineqarpoq, tassani partiinit isumaqatigiissutigineqarpoq siunnersuut Ilaqutariinnermut Peqqissutsimullu Ataatsimiititaliamut suliassanngortinneqassasoq.
- Inatsisartut immikkut ittumik ataatsimiigiaqquneqarnerminni Naalakkersuisut, Tunillaasuuttunik Nappaalanersuaqarneranut Ataatsimiititaliarsuaq, Nunatsinni Nakorsaaneqarfik pisortaqarfiillu allat, Covid-19-ip siammatsaalinissaanut, tamatuma nalaani pisarialinnik maannalu suli pisarialinnik pisinnaatitaaffilernissaat qulakkeerniarlugu inatsimmut allannguutissamik saqqummiiffigineqarlutik, Peqqissutsimut Naalakkersuisoq Kirsten Fencker inatsisip sivitsorneqarnissaanik siunnersuummik saqqummiussinermini nassuiaavoq.
Inatsit 2020-mi apriilip qaammataani Inatsisartuusunit suliarineqarami 2021-imi decembarip ulluisa 31-ianni atuuttussaajunnaarsinneqarnissaa aalajangiunneqarpoq. Peqqissutsimulli Naalakkersuisup Kirsten Fenckerip maanna nassuiaatigaa, inatsisissaq nutaaq inatsimmut atuuttumut taartaasussaq Inatsisartunut qinersisoqarnera pissutigalugu Naalakkersuisunit naammassillugu suliarineqarsimanngitsoq.
Taamaammat nalunaarut inatsisissap juulip allaqqaataani atuutilernissaata tungaanut sivitsorneqartariaqarsimavoq. Pilersaarutaavoq inatsisissatut siunnersuut 2022-mi juulip aallaqqaataani atuutilersussaq 2022-mi upernaakkut ataatsimiinnermi saqqummiunneqassasoq.
Partiit isumaqatigiittut
Sapaatip akunnerani kingullermi siullermeerinnillu suliarininnermi partiit isumaqatigiissutigaat, nappaatit Covid-19-itut ittut tunillaassuunneri akiorniarlugit inatsiseqartoqartariaqartoq, Covid-19-illu akiorniarneqarnera suli pingaaruteqarluartoq.
Demokraatit oqaaseqartartua taAnna Wangenheimip, maanna Naalakkersuisuusut aasaq manna meeqqat akornanni tuniluuttoqalermat Naalakkersuisut saqqummilaanngippallaarnerarlugit isornartorsiorpai.
Ilaatigut Ilinniartitaanermut Naalakkersuisoq, Aningaasaqarnermut Naalakkersuisoq Inuussutissarsiornermullu Naalakkersuisoq tuniluuttoqarnerani Naalakkersuisutut akisussaasuusut apeqqummi annertuumi matumani saqqummilaarnerunissaat ujartorpaa.
Naalakkersuisut sumiippat
- Tassamiuna Naalakkersuisut tamarmiusut Inatsisartunit pisinnaatinneqarsimasut nalunaarutit aqqutigalugit innuttaasut inuussutissarsiortullu peqqinnissaat ingerlalluarnissaallu qulakkeerneqarnissaat, nunarsuarmi tuniluuttoqarneranik pakkersimaarinnissaq siunertaraluguttaaq. Uani Naalakkersuisut ataatsimoortut maqaasivakka, aammalu maqaasivara, Naalakkersuisunut ilaasortat ataasiakkaat annerusumik akisussaaffimmik tigusinissaat, akisussaaffimmik tunniunneqarsimasunik timitaliinissaannut, taanna oqaluttarfimmit oqarpoq.
- Inatsisip matuma sivitsorneqartariaqarnera qularutissaanngilaq. Taamaammat ataatsimiititaliap suliamik aallartitsinissaa qilanaaraara. Demokraatineersullu anna Wangenheimip oqaaserisaanut tusaatissatut tiguneqartumut qujanaq, Peqqissutsimut Naalakkersuisoq Kirsten Fencker naggasiiluni oqaaseqarnermini oqarpoq
Inatsisip sivitsorneqarnissaanik siunnersuut pilersaarutit malillugit oktobarip 28-ani siullermeerlugu suliarineqassaaq, novembarillu sisamaani pingajussaaneerlugu suliarineqassalluni.