Trumpip siunnersuisuaniit nalunaarut: Kalaallit Nunaannut nutaarsiassatsialak
Amerikamiut Kalaallit Nunaannut soqutiginninnerulernerat qanoq iluaqutiginiassallugu, Kalaallit Nunaata paasiniapallattariaqaraa, immikkut ilisimasallit marluk naliliipput.
Præsident Donald Trumpip sillimaniarnermut siunnersuisuia John Bolton tweet atorlugu ippassaq unnulluinnartoq nalunaaruteqarpoq, Kalaallit Nunaat pillugu USA-p Danmarkimi aallartitaa Carla Sands oqaloqatigisimallugu. Taanna allappoq oqaloqatigiissutigineqartut tassaasut 'USA-p Kalaallit Nunaannut aningaasaqarnikkut attaveqarnerat annertusarneqarnissaat, taakkunani ilaallutik aatsitassarsiornerup iluani aningaasaliissutit aamma mittarfiit allilerneqarnissaat'.
Forsvarsakademimi lektor Jon Rahbek-Clemmesen oqarpoq, taama nalunaaruteqarneq USA-p Kalaallit Nunaannut ukiuni arlalinni kingullerni qaninngoornermit, maannalu qaninngoornerup ersarinnerulersimanenut tunngassuteqartoq.
- Tamanna Kalaallit Nunaannut nutaarsiassatsialaavoq. Siornatigornit tigussaaneruvoq, suli tigussaavallaanngikkaluartoq. John Boltonili tweet atorlugu taama nalunaaruteqarnera isumaqarpoq USA Kalaallit Nunaanni sillimaniarnikkut politikkimi soqutigisani qulakkeerumallugit akiliinissamut piareersimasoq, Sermitsiaq.AG-mut oqarpoq.
Danmark peqataatillugu peqataatinnaguluunniit
USA-p oqaloqateqarumasutut nipeqarnera Kalaallit Nunaannut tunngaviatigut pitsaasuusoq pillugu, Aalborg Universitetimi issittumi kultoori politikkilu pillugit lektori, Ulrik Pram Gad, isumaqataavoq. Soqutiginninnerullu annertusinerata kinguneranit pissarsiaqarnerunissaq anguniarlugu Naalakkersuisut Inatsisartullu maanna paasiniaasariaqalersut taassuma erseqqissaassutigaa.
- Siullermik isumaqatigiittoqartariaqarpoq Danmark peqatiginagu, soorlu Pele Broberg (PN) taama siunnersuuteqartoq, isumaqatiginninniarnerit ingerlanneqassanersut, imaluunniit maannakkutut itsillugu Danmark peqataatinneqassanersoq. Kim Kielsenili kisermaassilluni ingerlatsisutut takorlooruminaappoq. Allatulli aaqqiissutinik aamma eqqarsaateqartoqarsinnaavoq, oqarpoq.
- Aappaattut eqqarsaatigineqartariaqarpoq USA qanoq iliussanersoq, taamalu iliorpat qisuariarneq qanoq ittuussanersoq. USA-mut piumasaqaatit pingaarnersiorneqarnissaat pillugit isumaqatigiittoqartariaqarpoq.
Ulrik Pram Gadip ilanngullugu erseqqissaatigaa piumasaqaatit sorliit USA-p naammasseriaannaanerai sorliillu naammassiuminaatsissinnaanerai paasilluassallugu.
Aatsitassarsiornermi aningaasaliinerit
USA-mut isumaqatiginninniarnissamut maanna piareersartoqartariaqalernera pillugu Jon Dahl-Clemmesen isumaqataavoq.
- Isumaqatigiinniarnerit soorunami matoqqasumik ingerlanneqassapput, sammisallu mianernartuussallutik. Tassani takuneqarsinnaalissaaq USA sunik neqeroorutissaqarnersoq. USA-p Kalaallit Nunaanni soqutigisani paariinnassallugit suut periarfissarineraa paasissallugit ajornarnavianngilaq. Nalilersinnaavara USA-p suut periarfissarinerai Kalaallit Nunaanni soqutigisatik paarissallugit. Inissitassaq pingaaruteqarnerpaasoq tassaassaaq kina akiliissanersoq qanorlu akeqassanersoq.
Ulrik Pram Gadip maluginiarpaa John Boltonip tweetimini mittarfinnut aningaasaliinissat kisiisa taanagit aammali aatsitassarsiornermi aningaasaliinissat taagai.
- Tupaallalaarpunga, tassungalu apeqqut pingaarneq tassaavoq aningaasaliinerup suna imarissaneraa. Assersuutigalugu Kinami suliffeqarfiit naalagaaffiup pigisai naalakkerneqarsinnaapput suliniutinut aningaasaleeqqullugit, amerikali naalagaaffittut toqqaannartumik aatsitassarsiornernut aningaasaliisinnaanngilaq. Taamaattumik apeqqutaalerpoq suliffeqarfiit namminersortut aatsitassarsiornernut aningaasaleerusussusaat annertusarniarlugu ajornannginnerulersitsiniartut, imaluunniit qularnaveeqqusiillutik aningaasaleerusunnersut, Ulrik Pram Gad oqarpoq.