Trumpip Pompeop 'tullersortaa' Nuummukartikkaa
Amerikami nunanut allanut ministerip qaninnertut suleqataa maanna Kalaallit Nunaanniippoq, Berlingske taamatut allappoq
Ateq T. Ulrich Brechbuhl tamanit ilisimaneqanngilaq. Berlingskeli naapertorlugu, taanna tassaavoq Amerikami nunanut allanut ministerip, taamalu Donald Trumpip nunanut allanut tunngasutigut politikkiinik naammassinnittartoq.
Berlingske naapertorlugu, taanna Amerikamiut ambassadørianik Carla Sandsimik aamma Pentagonimit Nationale Sikkerhesrådimillu aallartitat peqatigalugit maanna Nuummiiippoq.
Brechbuhl oqarpoq, ikiuukkiartorluni Kalaallit Nunaanniilluni.
- Soorunami nalunngilara Kalaallit Nunaanni isumaginninnikkut ilinniartitaanikkullu unammilligassaqartoqartoq, isumaqarpungalu danskit siuttuisa uagullu isumaqatigiissutigisinnaagipput, pisuni taama ittuni USA isumalluuteqartoq ikiuinermi atorneqarsinnaasunik, taassuma Amerikamiut nunarsuarmi pitsaanerpaanik ilinniartoqarfeqarnertik innersuussutigalugu Berlingskemut oqaatigaa.
Tamatumunngali peqatigitillugu erseqqissaatigaa, USA-p pilerisaarinera nammineq soqutigisanik tunngaveqartoq.
- Uagutsinnut pingaaruteqarpoq erseqqissaatigissallugu, Kalaallit Nunaata issittullu isumannaatsuujuarnissaasa, siuariartortuarnissaasa Amerikamullu Avannalermut atajuarnissaasa qulakkeerneqarnissaannik kissaateqarnerput. Sumiiffiup nunat killiit naleqartitaannut isumannaattuujuarnissaa neriuutigaarput, taanna aviisimut oqarpoq.