Trumpip naapinnissaa: Savalimmiut USA niuernikkut isumaqatigiissuteqarfigerusukkaa
Savalimmiuni naalakkersuisut siuttuat Amerikamiut præsidentiat Donald Trump 2.-3. september Danmarkimi tikeraartussaq naapileruniuk niueqatigiinneq oqaluuserisassani ilaatikkusuppaa
Statsministeri Mette Frederiksen, naalakkersuisut siulitaasuat Kim Kielsenip, lagmandi Aksel V. Johannesen præsidentilu Donald Trump naapeqatigiinnissaannut oqaluuserisassat suli aalajangerneqanngillat.
Issittoq sillimaniarnikkullu politikki oqaluuserisassaniipput, statsministeriamiit nalunaarummi taama allaqqavoq. Sammisat taakkua marluk pingaarnerit peqqutaallutik naalagaaffeqatigiinnermi siuttut pingasut tamarmik naapeqatigiilernerannut politikkikkut alaatsinaatsut arlallit naliliipput.
Savalimmiut lagmandiat Aksel V. Johannesen periarfissinneqaruni USA-p Savalimmiullu niueqatigiinnerat pillugu oqallinnermi piffissaq atussavaa.
- Illuatungeriit attaveqaqatigiittarput, kisianni nalunngilarput Savalimmiut nuna mikisuusoq. Nunat anginerit niuernikkut isumaqatigiissuteqarfiginiaraangatsigit kingulliunneqakujuttarpugut. Niuerneq oqaluuserisassanut ilanngunneqassappat ineriartorneq aallartissinnaavoq, Aksel V. Johannesen Savalimmiut public service-stationianut, Kringvarp Føroyamut oqarpoq.
USA niueqatigiiffinni annerpaat pingajuat
Savalimmiut avammut aalisakkanik pingaartumillu kapisilinnik tunisineranut USA niueqatigiiffiuvoq pingaarutilik. Savalimmiut 2018-imi USA-mut 700 millionit koruunit nalinganik tunisisimapput.
Taamaalilluni USA Savalimmiut nueqatigiiffianni annerpaat pingajoraat.
Tuluit Nunaat Ruslandilu kisimik Savalimmiuniit aalisakkanik niuernerupput. Siorna Ruslandi aalisakkanik 2 milliardit koruuningajaat nalinganik pisisimavoq.
Ullut marluk sioqqullugit lagtingimut qinersisoqaraluartoq lagmandiussasoq
31. august lagtingimut qinersisoqassaaq. Lagmandi nutaaq aatsaat qinersisoqareerpat ullut suliffiit 12-it qaangiuppata qinerneqarsinnaavoq, taamaattumik Donald Trump septembarip aallartinnerani Danmarkimiinnerani Aksel V. Johannesen suli lagmandiussaaq.
Aksel V. Johannesen isumaqarpoq Savalimmiunut sinniisuunissani ajornartorsiutissartaqanngitsoq. USA-p præsidentiata naapinnissaanut angertoqartariaqarpoq.
Aammattaaq Savalimmiunut Issittumi susoqarnera pillugu ilisimatinneqarnissaa pingaaruteqarpoq, lagmandi oqarpoq.
- Issittumi tassanilu susoqarnera pillugu soqutigisaqaqaagut. Issittup avammut killinganiippugut, taamaammallu USA-p Issittoq pillugu soqutigisaasa tusarnissai soqutiginarput, Aksel V. Johannesen oqarpoq.