Skip to main content

Trumpip kissaataa partiinit isumaqatigineqanngilaq

Kalaallit Nunaanni partiit tamakkerlutik erseqqilluinnartumik oqaatigaat Kalaallit Nunaat tuniniarneqanngitsoq, aammalu nunatsinni pisuussutit tiguinnagassaanngitsut.

- Tuniniarneqanngilagut aamma nioqqutaanngilagut. Trump taama isumaqarsimaguni tamanna nammineq sinnattoriinnarniarliuk. Inoqatiminullu allaanerungaatsiartumik isiginnittaaseqarneranik takussutissiiginnarpoq, IA-p siulittaasua Muté B. Egede allakkatigut akissummini allappoq.

Taassuma erseqqissaatigaa Kalaallit Nunaat, Danmark aamma USA isumaqatigiissuteqarmata – Igalikumi isumaqatigiissut – tassanilu allaqqammat illuatungeriit naligiimmik ataqqeqatigiillutillu suleqatigiissasut.

Nunasiaataaneq qaangiutereerpoq

Suleqatigiissitsisut Inatsisartuni ilaasortaatitaat Donald Trumpip taama oqaaseqarnera pimoorutivissinnaanngilaa.

- Donald Trump ingasattajaarpoq. Issittup soqutigineqarnerulernissaa pillugu taama isiunnginnerluni. Pimoorussinnaanngilaami. Nunasiaataaneq qaangiutereerpoq, Donald Trumpilu taama oqaaseqarnermini Kalaallit Nunaat Danmarkillu akornanni ataqatigiilluarneq aserorniarpaa, Suleqatigiissitsisunit Tillie Martinussen oqarpoq.

- Isumaqarpugut Donald Trumpip pilersaarutini unitsissagai paasiniarluguli California, Florida Alaskalu qanoq akeqarnersut, taakkumi pisiarerusussinnaavagut, Tillie Martinussen illarpoq, præsidentillu neqerooruteqarsimanera taamaasilluni ilaarutigalugu.

Kalaallit Nunaanni inuussutissarsiornermi inuiaqatigiinnilu iluaqutaasussat anguniarlugit, Kalaallit Nunaata USA-llu akornanni niueqatigiinnissaq Muté B. Egedep aallukkusunneruaa.

Aammali nassuerutigaa Issittoq ukiuni kingullerni soqutigineqarneruleraluttuinnartoq.

- Arlaannaataluunniit arajutsinngilaa Issittup soqutigineqarnera annertusigaluttuinnartoq. Tamanna aamma isumaqarpoq inuiaqatigiinni ikitsunnguanik innuttaqartumi, piareersimanerusariaqartugut. Kingunissaami pitsaasut pitsaannginnerusullu piareersimaffigisariaqarpagut. Soqutiginninneq aatsaat aallartilaaginnarpoq, annertusiartussallunilu, oqarpoq.

Kalaallit Nunaat namminiilivissaaq

Siumut sinnerlugu Inatsisartuni ilaasortap, Karl-Kristian Krusep nunatta namminiilivinnissaa immikkut taajumavaa.

- Nunatsinni namminiilivinnissaq sulissutigingaatsiarnikuullugu, taava soorunami erseqqissumik oqartariaqarpugut nunarput tuniniagaanngilaq. Qanormi aamma tuniniarneqassua? Karl-Kristian Kruse apeqqusiivoq.

Pele Broberg (PN) aamma taama isumaqarpoq, USA-llu neqeroorniarnera danskit naalakkersuisuisa akuleruffigissanngikkaat.

- Nunarput soorunami tuniniarneqanngilaq. Kisiannili nunarput pisiariumallugu neqeroortoqarpat Danmarkip akissuttussaanngilaatigut. Uagununa nammineq nunarput, uagut nammineq akissaagut, akissutaasoq ersarilluinnartoq tassaavoq naamik, Pele Broberg oqarpoq.

Taassumalli erseqqissaatigaa nunami pissaanilissuarmi præsidentip nunarput pisiarerusuppagu tamanna aamma aarlerinartoqartoq.

- Soorunami aarlerinartoqarpoq. Pingaartumik eqqarsaatigissagaanni USA nunap inoqqaavinut qanoq iliorsimanersoq, tassa reservatinut immikkut inissiinikuusoq. Taava nunatsinni aamma reservateqalissava pisiarineqarutta? Pele Broberg oqarpoq.

Mianersorluni tutisoqartariaqarpoq

Inatsisartuni ilaasortat erseqqissarpaat Naalakkersuisut Siulittaasuat danskit ministeriunerannik Mette Frederiksenimik USA-llu præsidentianik Donald Trumpimik qaammatip tulliani naapitsileruni mianersussasoq.

- Naalakkersuisut Siulittaasuata danskit ministeriunerannik amerikallu Præsidentiannik ataatsimeeqateqaleruni mianersornissaanik, nunattalu soqutigisai pillugit naapitsissasoq kaammattorusuppara. Amerikamiullu isumaliutersuutaannik arlaannik Naalakkersuisut ilisimasaqassappata, kaammattuutigerusuppara paasissutissat saqqummiunneqassasut, Muté B. Egede naggasiivoq.

Niuernissamut periarfissatsialaavoq

USA-p præsidentiata Issittoq Kalaallit Nunaallu soqutigilluarpagu, tamanna nunatsinnut iluaqutissatut atorluarsinnaavarput, Atassummi siulittaasoq Siverth K. Heilmann isumaqarpoq.

- Amerikamut niuernermi periarfissat sammerusunneruagut. Kimmut qiviarnermi periarfissat pitsaasut aamma takuneqarsinnaapput, soorlu aamma imaatigut silaannakkullu angallannermi aqqutigissaalersinnaasoq, oqarpoq.

Taassuma tikkuarpaa Naalakkersuisut siulittaasuata Kim Kielsenip danskillu ministeriunerata Mette Frederiksenip USA-p præsidentia piffissami sivikitsuinnarmi naapisimaartussaassagunaraat. Soqutiginninneq atorluarneqartariaqarpoq.

- Soqutiginninnera atorluartariaqarparput, isumaqatigiissuteqarfiginiarneqarsinnaappummi niuernerup tungaatigut, Siverth K. Heilmann oqarpoq. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER