Trump suluiarneqartoq: Inatsisissatut siunnersuutit Demokraatinit unitsinneqarsinnaasut

Demokraatit USA-mi qinigaaffiup qiteqqunnerani marlunngornermi qinersinermi Repræsentanternes Husimi amerlanerussuteqalerput. Republikanerilli Senatimi amerlanerussuteqarluarput.

Amerikami nutaarsiassaqartitsiviit arlallit – soorlu CNN Fox Newsilu – nunatsinni nalunaaqutaq pingasunngornermi ullaassanngortoq allaaserisaqarput.

Kisitsinerit maannamut takutippaat Demokraatit Repræsentanternes Husimi 24-nik issiasuutitaqalersut, tassa Kalaallit Nunaata nalunaaqutaa malillugu ullaakkut pingasunngornerani. Politikkimut tunngasunik nittartakkakkut nutaarsiassaqartitsivik realclearpolitics taama allappoq.

Partii 23-nik issiasuutitaqaleruni amerlanerussuteqalertussaavoq. Qinersiviit 100-t kisitsiffigineqarnissaat suli amigaataavoq, CNN-imilu nutaarsiassat malissagaanni, qinersiviit tamakkerlugit kisitsiffigineqareerpata, Demokraatit amerlanerussuteqarnerat annertunerussasoq qulakkeerneqareerpoq.

Demokraatit Repræsentanternes Husimi ikinnerussuteqarlutik siuttuat, Nancy Pelosi, ajugaaneq qularnaarmat Washingtonimi oqalugiarnermini oqarpoq, oqaluttuarisaanermi ajugaaneq annertusoq.

- USA-mi aqagu ulloq nutaajussaaq, Pelosi ilaatigut taama oqarpoq.

USA-p præsidentiata, Donald Trumpip, Pelosi pilluaqqullugu sianerfigereersimavaa. Pelosip atorfilittaasa pisortaata tullia Twitterikkut taama ilisimatitsivoq.

- Partiip ajugaanerani siuttutta oqalugiarnermini partiit akornanni suleqatigiittoqarnissaanik kaammattuinera, Trumpip akueraa, atorfilittat pisortaata tullia taama allappoq.

Republikanerit Kongresseimi inatsisartut ataatsimiittarfiini marluusuni ikinnerussuteqaleraluartut, taamaattoq qinersineq iluatsilluartutut Trumpip nalilerpaa.

- Unnummut iluatsilluinnarpoq. Tamassinnut qujanaq, Trump nittartakkami attaveqatigiiffimmi Twitterimi allappoq.

Republikanerit Senatimi ajugaapput, amerlanerussuteqareernertik annertusigamikku.

Nittartakkap realclearpoliticsip allaaserisai naapertorlugit, Republikanerit amerlanerussuteqarnertik sisamanik ilavaat, taamaasillutik 55-inik issiasuutitaqalissallutik. Senatimi issiaviit 100-pput, Republikanerillu maannamut 51-inik issiasuutitaqarsimagaluarlutik.

Trumpip ukiuni marlunni præsidentiunerani, partii inatsisartuni issiasuutitaminik aatsaat ikinnerussuteqalerpoq.

Repræsentanternes Husimi Demokraatit amerlanerussuteqaleramik inatsisissatut siunnersuutigineqartut republikanerineersut maanna unitsissinnaanngorpaat.

Repræsentanternes Husimi inatsisitigut aaqqissuusseqqinnermut ataatsimiititaliami siulittaasutut ilimagineqartup, Elijah Cummingsip oqaasii naapertorlugit, Demokraatit amerlanerussuteqarnerminni Donald Trumpip akileraartarnermut tunngasunik pappialaataanik saqqummersitsiniarnissaq anguniassavaat.

- Præsidenteqarpugut arlaannaanulluunniit akisussaatinneqanngitsumik, nutaarsiassaqartitsivimmut CNN-imut taama oqarpoq.