Trump nunami ajornartooruteqarnermik nalunaarpoq
Amerikamiut suliffeqarfiisa attaveqaqatigiinnermut atortut nunami isumannaallisaaniarnermut navianartorsiortitsisunit tunisassiarineqartunik atueqqusaanngillat. Tamanna Huaweimut inerteqquteqalernermik kinguneqarsinnaavoq.
Amerikamiut præsidentiat, Donald Trump, pingasunngornermi danskit nalunaaqutaat malillugu unnukkut peqqussummik atsiorpoq, nunami ajornartooruteqarnermik nalunaaruteqarluni.
Amerikamiut suliffeqarfiisa attaveqaqatigiinnermut atortut, suliffeqarfinnit nunap isumannaallisaaniarneranut ulorianartorsiortitsisunik atuisinnaajunnaarnerannik tamanna isumaqarpoq.
Kinamiut attaveqaqatigiinnermut tunisassiortuannut angisuumut Huaweimut niuernissamut inerteqqusiornissamut tamanna aqqutissiuivoq. Nutaarsiassaqartitsivik AP taama allaaserisaqarpoq.
Peqqussutip præsidenti niuernermik malittarisassiorsinnaalersippaa, USA-mut nunamik ajornartooruteqarnertut akissutilerlugu.
Niuernermut ministeriaqarfik peqqussutip atuutsinneqarnissaannut pilersaarummik ullut 150-it iluanni suliaqassaaq.
Peqqussutip ’’nunanit allanit akeqqat nunap paasissutissaataanik aamma attaveqaqatigiinnermut teknologiiannut isussutissarsinissaat pinngitsoortissavaa’’, USA-p niuernermut ministeria, Wilbur Ross taama oqarpoq.
- Præsident Trumpip aqutsinerani paasissutissaatigut aamma attaveqaatigut qularnaatsuunerat amerikamiut tatigisinnaavaat, Wilbur Ross oqarpoq.
Nutaarsiassaqartitsiviup AP-p allaaserisaa naapertorlugu, Huaweip amerikamiut iliuusaat assuraa.
- Huaweip USA-mi nioqquteqarsinnaanerata unitsinneqarnerata USA isummannaannerulersinnavianngilaa imaluunniit nukittunerulersinnavianngilaa, akerlianik USA killilerlugu atortut pitsaannginnerusut aamma akisunerusut atulersinneqassapput, Huawei tusagassiuutinut nalunaarummi allappoq.
- Tamatuma saniatigut tulluanngitsunik killilersuinerit Huaweip pisinnaatitaaffii unioqqutinneqassapput, inatsisitigullu ajornartorsiutinik pilersitsillutik.