aatsitassat

True North Gems royaltymik akiliisassaaq

Aatsitassarsiorfik True North Gems Qeqertarsuatsiaat eqqaanni aallartippat aatsitassanut aningaasaateqarfimmut akiliutissat minnerpaaffissalerneqarput

Aappaluttumi tupeqarfiusimasoq aatsitassarsiorfinngussaaq

True North Gems kaaviiaartitamik 5,5 procentianik royaltymik namminersorlutik oqartussat aatsitassanut aningaasaateqarfiannut akiliisassaaq. Naalakkersuisulli oqaatigisinnaanngikkallarpaat aningaasat qasserpiaat isertinneqassanersut. Suliffeqarfik sinneqartuussappat royalty allanngortinneqassaaq.

Qeqertarsuatsiaat eqqaanni aatsitassarsiorfissaq landskarsimut aatsitassanullu aningaasaateqarfimmut aningaatigut pissarsissutaassaaq. Naalakkersuisut aamma True North Gems isumaqatigiipput kaaviiaartitat 5,5 procentiat royaltimut akiliutaassasoq.

Aningaasartalinngilaat
- Isumaqatigiissutip aningaasatigut qanorpiaq isertitsissutaasinnaanerata oqaatiginissaanut siusippallaarpoq, inuussutissarsiornermut, aatsitassanut suliffeqarnermullu naalakkersuisoq Jens-Erik Kirkegaard Sermitsiaq.AG-mut oqarpoq.

Aamma landskarsi Kommuneqarfik Sermersoorlu isertitaqassapput. Ilimagineqarpoq aatsitassarsiorfissap piareersarnerani inuit 40-50-it sulisorineqassasut aatsitassarsiornerlu aallartilluarpat ilimagineqarpoq sulisut 80-ut amerlineqassasut.

- Aatsitassarsiorneq aallartippat akileraarutitigut isertitsisoqartalissaawq, Jens-Erik Kirkegaard oqarpoq.

Royalty pillugu isumaqatigiissut akiliutaasussap minnerpaaffilerneranik taaneqarpoq. Taanna atorunnaarsinnaavoq millilluniluunniit suliffeqarfik akileraartalissappat. Aamma annertuumik sinneqartoortoqassappat suliffeqarfik sinneqartoorutinit royaltymik akiliuteqartinneqalissaaq.

Powered by Labrador CMS