Skip to main content

Trudeau qineqqusaarnermi illersuummik aaqanngitsoqartoq

Canadap premierministeria maanna qinigaaqqinniarsarisoq arlaleriarluni sioorasaarneqartarsimavoq

Canadap premierministeria, Justin Trudeau, illoqarfiup Torontop avalequtaani Mississaugami arfininngormat qineqqusaartoqarnerani aqerlumik pitarneqarsinnaanngitsumik aaqanngitsoqarpoq.

Isiginnittut tamanna nutaarsiassaqartitsivimmut Reutersimut oqaluttuaraat.

Aaqqissuussinermit assilisami premierministerip liberaliusup ilullimi tungujortup qaamasup iluatigut aqerlumik pitarneqarsinnaanngitsumik aaqanngitsoqarneranut ersiutit takuneqarsinnaapput. 

Trudeau qineqqusaarnermi qungujulavoq qinersisartunillu oqaloqateqarluni. Parlamentimut oktobarip 21-ani qinersinissamut qinigaaqqinniarsarivoq. 

Trudeau arlaleriarluni sioorasaarneqarsimanerarneqarpoq. Tusarfiit naapertorlugit Canadami oqartussat naalakkersuisut siulittaasuannut 47-nik ukiulimmut isumannaallisaanikkut aarlerinartorsiortitsisoqarneranik paasisaqarsimapput. Canadami tv-eeqarfik CBC taama oqaluttuarpoq.

Qinersisartunik ataatsimiititsinermi siusinnerusukkut pisunut assingusunut sanilliullugu aamma malunnartumik amerlanerusunik politeeqarpoq. 

Canadami qineqqusaarneq naggataasersorneqaleraluttuarpoq. Isumasiuinerit Trudeaup partiiata liberaliusup illuatungiliuttullu konservativiusut naligiikannernerannik ersersitsipput. 

Sapaatip-akunneri siulliit pingaartumik Justin Trudeaup inuttaanut atatillugu kanngunartuliat arlallit malunnaateqarnerusimapput. 

Ukiut qulikkuutaat arlallit matuma siornatigut pisimasunut septembarimi arlaleriarluni utoqqatsertaqariaqartarsimavoq. Tamatumani ilaatigut immikkut atisalersorluni nuannateqatigiinnernut atatillugu kiinnani taartumik tanittarsimavaa. 

Iliuutsit taakkua premierministerip nammineq ‘ammip qalipaataa tunngavigalugu immikkoortitsiniarnerusutut’ oqaatigisimavai.

Trudeaup partiianit oqaaseqartitap aaqanngitsumik aqerlumik pitarneqarsinnaanngitsumik atuineq imaluunniit tamatumunnga pissutaasut oqaaseqarfigerusussimanngilai. 

Canadami politiit immikkut ittumik isumannaallisaanikkut iliuuserineqartut pillugit aamma oqaaseqanngillat. 

Trudeau arfininngornermi qinersisartunut aaqqissuussinermi tapersersuisunut takkussimasunut hundredenut arlalinnut oqalugiarpoq. 

Aaqqissuussineq qassiiliornertaqanngitsumik ingerlanneqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER