Trine Bramsenip suleqatigiinneq annertusarniarpaa
Illersornissamut ministerip Trine Bramsenip (S) illersornissamut polikki pineqartillugu Savalimmiut ilaatinneqarnerunissaa sapinngisamik anguniarniarpaa
Savalimmiuni naalakkersuisuusimasut danskit oqartussaasui illersornissamut politikkernerminni Savalimmiunik ilaatitsineq ajornerat pillugu isornartorsiungaatsiartarsimavaat. Lagmandinngorlaap Bárður Nielsenip, naalagaaffimmi nunat attaveqaqatigiittarnerisa allanngortinnissaa sulissutigeqqinniarpaa.
Allannguutissat piariingajalerput. Illersornissamut ministerinngorlaap tamanna uppernarsarsinnaavaa.
- Uannut pingaaruteqarpoq illersornissamut politikkimi sunaluunniit sammineqartillugu oqaloqatigiilluarlutalu suleqatigiilluarnissarput, Trine Bramsen oqarpoq.
Illersornissamut politikkimi suliassaqarfiit arlaliupput. Suliassaqarfiusinnaapput Savalimmiunit oqartussaaffigineqareersut, aamma suliassaqarfiusinnaapput Savalimmiut imartaani silaannartaaniluunniit suliaqarnermut attuumassuteqartut.
Suliassaqarfiit taakku arlaannaalluunniit pineqaraluarpat Savalimmiuni naalakkersuisut ilisimatinneqartarnissaat sulissutigineqarnerusariaqarpoq.
Suliassaq aallartinneqareersoq
- Tassa Savalimmiuni politikkerit, Danmarkimi Savalimmiunilu angerlarsimaffillit aalajangiisoqartussaatillugu issiaqatiginissaanut qaaqqussassavakka, Trine Brmasen oqarpoq.
Illesornissamut ministerip Trine Bramsenip suliassaq aamma aallartereersimavaa.
- Apeqqutaanngilaq uannut suna attortissutaanersoq imaluunniit politikkikkut aalajangiinerit annertuut pineqarnersut. Danskit oqartussaasui erseqqilluinnartumik oqarfigisimavakka, isumannaallisaanermut politikki pineqartillugu Savalimmiut attaveqarfigilluartassagaat. Ilisimatitsissutissaqartoqaraangat ilisimatitsissuteqartassasut, Trine Bramsen oqarpoq.
Nipaarsaarussisoqarsimaneq
Savalimmiuni aalisariutit 2018-imi aasakkut nunat allamiut umiarsuaataat sorsuutit suliaqarfigisaannit qimaguteqquneqarsimapput. Savalimmiuni naalakkersuisut aallaqqaammut isumaqarsimagaluarput sakkutuut sungiusartut. Kingusinnerusukkut aperisoqarmat paasinarsisimavoq, asuliunngitsoq pisoqarsimasoq.
Nunanut allanut naalakkersuisuusimasup, Poul Michelsenip (Framsókn), tusagassiorfiit susoqarneranik oqaluttuussinnaasimanngilai, naalakkersuisulli ilisimatinneqarsimannginnerat naammagisimannginnerarlugu.
Trine Bramsen taamani pisup nalaani akisussaasuunngilaq. Oqaatigaali itigartitsinerit malunnartitsinerillu pineqartillugit ingerlaannaq ilisimatitsinissaq ajornakusoorsinnaasoq. Imaassinnaavoq itigartitsisut isumannaallisaanermik ajoqusiisut.
- Erseqqissupilussuarmik oqaatigisinnaavara, aalajangiiffigisassaqartillugu aamma ilisimatitsissutissaqartoqartillugu Savalimmiut mattunneqarnissaannik kissaateqanngilluinnarama, Trine Bramsen oqarpoq.