Transparencyp pisassiissutinik nutaanik neqeroortitsineq isornartorsiorpaa
Naalakkersuisut periutsimik nutaamik atuilluni pisassiissuteqarnissamik nassuiaateqaratik, saarullinnik tonsinik arlalinnik pisassiissutinik neqeroortitsillutik nalunaaruteqarnerat isornartoqartoq, peqquserluttuliortoqartarneranik pinaveersaartitseqatigiiffik Transparency International Greenland isumaqarpoq.
Avataasiortunut saarullittassiissutit 5.515 tonsit kiisalu suluppaakkat 406 tonsit soqutigisalinnut suliaqartunut tamanut neqeroorutigineqassasut, poorskilernerani tupaallaatigineqartumik Naalakkersuisunit nalunaarutigineqarpoq.
Naalakkersuisut taamaalillutik suliami mumisitsipput, tassami maannamut saarullinnik 7.515 tonsinik aamma suluppaakkanik 406 tonsinik suliaqartumut nutaamut pisassiisoqarnissaa nalunaarutigineqarsimagaluarpoq, ingerlatseqatigiiffiillu marluk neqerooruteqartuupput.
Maanna periuseq peqquserluttuliortoqartarneranik pinaveersaartitseqatigiiffimmit Transparency International Greenlandimit (TIG) isornartorsiorneqarpoq.
Neqeroortitsinermi allagartanut pisassiissutinullu nalunaarummi § 19-imut innersuussisoqarmat, inatsisit malinneqanngitsut kattuffik isumaqarpoq:
Nassuiaateqannginnerat isornartorsioraat
- Tassani nalunaarummi tamanut neqeroortitsinermik allassimasoqanngilaq. Taamaallaat § 19-imi allagartaqalernissamut piumasaqaatit allassimapput, pisassiissutinik agguaassinermut tunngasunik allassimasoqanngilaq, TIG tusagassiuutinut nalunaarummi allappoq.
- Naalakkersuisut inatsit malillugu § 12 malillugu agguaassinatik sooq § 19 malillugu pisassiissutit agguarneqarnissaannut nassuiaateqannginnerat, TIG-p isornartoqartippaa. Taamatuttaaq pisassiissutinik agguaassisarnermut periutsip taamatut allanngortinneqarneranut aamma tunngavilersuisoqannginnera isornartoqartillugu.
Naalakkersuisut periusaat aamma Sulisitsisuni aalisarnermut ataatsimiititaliami siulittaasumit, Henrik Lethimit, assingusumik isornartorsiorneqarnikuuvoq. Naalakkersuisut pisassiissutinik nutaanik agguaassinerminnut atatillugu aalisarnermut inatsimmi § 12 malinngimmassuk, inatsisinik unioqqutitsisoqartoq aviisimut Sermitsiamut oqaatiginikuuaa.
Taamatut isornartorsiuisoqarneranut § 12 ukiumit ukiumut aalajangersimasunik nalilersuisarnissamut ammaassisoq, Aalisarnermut Piniarnermullu Naalakkersuisoqarfik akissuteqarpoq, pisassiissutillu immikkut piumasaqaatit malillugit neqeroortitsiffiussasut Naalakkersuisut aalajangiussimagaat. Naalakkersuisoqarfik naapertorlugu siornatigut taama pisoqareersimavoq.
Pisariaqassappat allagaatinik takunnikkumaniartoq
Qinnuteqaatit suliarineqarnerat ammasumik ingerlanneqarnissaat kattuffiup naatsorsuutigigaa, TIG nangilluni allappoq.
- Tamanna naammaginanngitsumik nalilerneqarpat, TIG allagaatinik takunnikkumalluni qinnuteqassaaq, kattuffik allappoq.
Tamatuma saniatigut pisassiissutit nutaat sumiiffimmi biologit siunnersuinerannik qaangeeqqittoqarneranik kinguneqassanersut suli ernummatigineqartoq, kattuffiup oqaatigaa:
- Transparency International Greenlandip biologit siunnersuinerannik qaangiilluni pisassiissutinik agguaasoqartarneranut ernumassuteqarnini siornatigut oqaatigereerpaa. Immamit pisuussutit killeqarput, aamma siunissami aalisarnerup qulakkeernissaanut nungusaataanngitsumik aqutsineq pisariaqarpoq.