Peqquserlunnermut akiuiniarneq
Transparencyp nunatsinni immikkoortoqarfia qaffatsinneqarpoq
Transparency International Greenland Transparency Internationalimut tamakkiisumik ilaasortanngortinneqarpoq
Peqatigiiffik Transparency International Greenland (TIG), 2011-mi pilersinneqartoq, maanna Transparency International-imut tamakkiisumik ilaasortanngortinneqarpoq.
Ilaasortanngortinneqarneq TIG-p siulittaasuata Anita Hoffer-ip tupinnanngitsumik nuannaarutigaa:
– Tamakkiisumik ilaasortanngornissamut sorpassuit naammassisassaapput, suleqatigiissitaliallu misissorsimavaa piumasaqaatit naammassinerivut. Suleqatigiissitaliap maanna Transparency International-imut inassuteqarsimavoq piumasaqaatit tamaasa naammassisimagivut, akuerisimallutalu. Nuanneqaaq.
Transparency International ukiut tamaasa nunarsuarmi sumiiffinni assigiinngitsuni peqquserlunnermut akiuiniarneq pillugu ataatsimeersuartitsisarpoq, ukioq mannalu tamanna aggustimi Malaysiami ingerlanneqassaaq.
Transparency Greenland Internationalip siulittaasua Anita Hoffer ataatsimeersuarnermi peqataassaaq, tassanilu ´Isumakkeerinnittarneq unitsillugu´ qulequtaralugu sammineqassaaq peqquserlunneq akiorniarlugu nunarsuarmiut sumit killissimanersut, misissorlugulu isumakkeerinnittarnerit qanoq ililluni unitsinneqarsinnaanersut.