Piviusulersaarut
Traileri takuuk: Qamuteralaat pillugit kalaallinit filmiliaq saqqummingajalerpoq
Kalaallit suliffeqarfii Partikular Productions aamma Jaakoor Graphics suleqatigiillutik piviusulersaarusiorput
Nuummi qamuteralattarneq pillugu filmiliami traileri ullumi septembarip aallaqqaataani saqqummerpoq. Filmi Untouchedimik taaguuteqarpoq, ukiullu ingerlanerani suliarinerata naammassinissaa naatsorsuutigineqarpoq.
- Qamuteralaat atorlugit pinnguallaqqissut malinnaaffigaavut. Aamma 1990-ikkunni qamuteralattartunik oqaluussaqarpugut, tassani qamuteralattarneq pillugu oqaluullugit, Amos Frederiksen oqaluttuarpoq.
Sunngiffik
Filmi Untouched sunngiffimminni suliaralugu Amos Frederiksen oqarpoq. Upernaap ingerlanerani filmiliornerit ingerlanneqarsimapputtaaq.
- Qamuteralattarneq pillugu filmiliornissara takorloortarpara, unalu filmip suliarinissaa ukioq manna aalajangiullugu. Partikular Productionimi Mala Broberg aamma Jaakoor Graphicsimit Arny Mogensen saaffigaakka, tassanngaanniillu sulinerput aallartippoq, Amos Frederiksen oqarpoq.
Silaqqikkaangat silami filmiliortarlutik oqaatigaa, silarlukkaangallu katiterinerit ingerlanneqartartut oqaatigalugu.
Tupaallannartoq
Piviusulersaarusiami tupaallannartortaqarumaartoq Amos Frederiksen oqarpoq.
- Kalaallit Nunaanni misilittarneqarsimanngitsoq saqqummiutissavarput. Aamma takutitassarput rekordiliinerugunarpoq, oqarpoq.
Untouchedip traileria ataani takuuk