Trailer takuuk: Nunatsinni paasisassarsiorluni angalaneq pillugu filmiliaq saqqummilersoq
Filmi Netfliximi isiginnaarneqarsinnaalersussaq "Against the ice" pillugu ilisarititsineq saqqummerpoq. Filmimi Nicolai Coster-Waldau pingaarnertut inuttaavoq.
Ejnar Mikkelsen, Kalaallit Nunaanni paasisassarsiorluni 1909-mi angalanikoq pillugu filimiaq saqqummingajalerpoq. Filmilu pillugu trailer saqqummersinneqaqqammerpoq.
Pisimasumi inuttaq pingaarneq Nicolai Coster-Waldaumit inuttalerneqarsimavoq. Filmimi inuttap pingaarnerup Alabamameersut nunatsinni paasisassarsiorlutik angalasut siulersorpai uppernarsiniarlugu Kalaallit Nunaat qeqertarujussuusoq.
Paasisassarsiorlunili angalaneq pilersaarutinit allaanerujussuarmik kinguneqarpoq. Mikkelsen aamma Iver Iversen sermersuakkoorlutik pisuttariaqalerput, arlaleriarlutillu ulorianartorsiorujussuarlutik, soundvenue nittartakkamini allappoq. Nittartakkami traileri takusinnaavat.
Filmimi inuttat ilagaat Nicoali Coster-Waldaup ‘Game of Thrones’-imi peqataaqatigisimasaa Charles Dance aamma islandimiu Heida Reed.
”Against the Ice” Netfliximi 2. marts 2022 takuteqqaarneqassaaq.