Tour de Nuuk peqataaffigineqarluartoq ullumi naammassineqassaaq
Nuummi ullut arfineq-marluk arpatsitsineq ullumi naggataamik arpatsitsissaaq. Peqataasoqarluarnera aaqqissuisut iluarisimaarpaat, ajugaasussatullu inissittut aamma nassaarineqareerput.
Inuit 80-it missaat ulluni arfineq-marlunni arpatsitsisaqattaarnermi, Tour de Nuuk-mi, ukioq manna peqataapput. Aaqqissueqataasoq Anton M. Petersen Sermitsiaq.AG-mut oqaluttuarpoq angutini arnanilu ajugaasutut inissittut nassaarineqareersimasut.
- Angutini Mads Christensenip ajugaanissani qulakkeereerpaa, tulliulluni Søren Wurth. Arnani Nivi Geisler siuttuuvoq, tulliulluni Julie Simonsen, Anton M. Petersen oqaluttuarpoq.
Pisarnertut siuttuni pingajuat suli inissinngilaq, ullumilu arpannermi nal. 11.00 aallartittussami aatsaat paasineqassalluni.
- Arpatsitsisaqattaarnerit ornigarneqarluarput. Kajumissutsimik suliaqartut aningaasaliisullu qujassutissaqarfigivagut, taakkoqanngippat ingerlatsisinnaasimanaviannginnatta, Anton M. Petersen oqarpoq.
Timimut ilungersunartoq
Taanna oqaluttuarpoq ullormi siullermi arpanniarlutik peqataasut 80-it missaanniittut. Sapaatip akunneratali ingerlanerani peqataasut pisarnertut ikiliartuaarsimapput.
- Arpattut ilaat timimikkut ajoqusilaarsinnaasarput imaluunniit qasuallaalerlutik arpaqataanngitsoortalertarlutik. Timimut ilungersunartorujussuuvoq. Maluginiarparpulli arpaqataaniarlutik nalunaartut aamma nutaartaqartartut, tamanna ajunngilluinnarpoq. Arpaqataasimasut tamakkipajaarlutik ullumi peqataanissaat naatsorsuutigaarput, oqarpoq.
Tour de Nuummi arpatsitsinermi aqqusinikkut arpanneq, nunakkut arpanneq, qummukajaakkut tummeqqakkullu arpannerit, naatsumut takisuumullu arpatsisinerit kiisalu naggataasersorluni arpatsitsineq ingerlanneqarput.
Aaqqissuisut oqaluttuarput nalinginnaasumit silaqqinnerungaatsiarsimasoq. Tour de Nuuk ukioq manna aappassaanik ingerlanneqassaaq oktoberimi novemberimiluunniit.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...