Torersumik qineqqusaartoqarnissaa Aleqap kaammattuutigaa

Aleqa Hammond (NQ) isumaqarpoq, Siumut Socialdemokratinut pituttorpata, tamanna Kalaallit Nunaata soqutigisaanut pitsaanerpaajunavianngitsoq.

- Siumut ileqquni paatsuugasumillu ilumoornermik tunngaveqarluni Folketingimut qinersineq sioqqullugu Socialdemokratit siulittaasuat ministeriunertut toqqaramikku assatik isikkatillu pituttoreerpaat. KNR naapertorlugu Siumut isumaqarpoq, qinersineq qanorluunniit inerneqaraluarpat Socialdemokratit toqqassallugit tapersersuerpalaarnerusoq. Kimut tapersersuineq? Nunarput imaluunniit Socialdemokratit?

Taama nalunaarpoq Siumut sinnerlugu folketingimut qinigassanngortitoq, Ineqi Kielsen, tusagassiutinut ippassaq nalunaaruteqarluni, Aleq Hammondip kina ministeriunertut toqqassanerlugu aalajangiusimannginnera pillugu isornartorsiuereersorlu. Nunatta Qitornai sinnerlugit politikeri isumaqarpoq, Mette Frederiksen toqqariissagaanni isumaqatiginninniarsinnaajunnaarnermik kinguneqassasoq.

- Nammineq parteertik, minnerunngitsumillu nunarput, isumaqatigiinniarnermi pitsaanngitsumik inissippaat. Qujanartumik Siumut kisimi taamatut isumaqarpoq, Folketingimi ilaasortat Atlantikup Avannaaneersut arlallit aamma maannakkut ilaasortaasut periusissiap qinigaaffimmi kingullermi periuserineqartoq toqqarmassuk.

Misilittakkani ilikkagaqarfigai

2016-ip naanerani Aleqa Hammond danskit naalakkersuisuinik uppisitsissanani isumaqatigiissuteqarpoq. Isumaqatigiissuteqarnermi Kalaallit Nunaat pillugu ataatsimiititaliami siulittaasunngorpoq, qinersinerup kingorna Venstre tassani siulittaasuutitaqaraluartoq. Taanna isumaqarpoq, illuatungeriinnut tamanut isumaqatiginninniarsinnaanissaq isumaqarnerusoq.

- Uanga aamma siusinnerusukkut isumaqarsimavunga, parteeqatip danskip suleqatiginissaa isumaqarluartoq, nassuertariaqarpungalu misilittakkakka ilinniutigisimallugit. Danskit naalakkersuisuinik isumaqatigiissuteqarneq Kalaallit Nunaannut iluaqutaanerujussuunikuuvoq, Socialdemokratinik illuatungiliuttutut suleqateqarsimaninningaanniit. Danskit Folketingimi gruppiannut uniinnarlunga ilaasortaanissara anguniagarinngilara. Politikkikkut takorluukkat piviusunngortinneqassappata piumasaqaataavoq, danskit soqutigisaat akimorlugit isumaqatigiinniarsinnaaneq.

- Pisuuteqattaanneq unitsilli

Ineqi Kielsen tusagassiutinut nalunaarutini, 'Aleqa Hammondip issiavissani akisunermik tunisisumut tunniunniarlugu nalunaaruteqareersorlu' nassiullugu ilisimatitsivoq.

Aleqa Hammondip Ineqi Kielsen eqqaasippaa Siumut qineqqusaartitassaminik saqqummiinerani siulittaasuat qanoq allassimanersoq.

- Qanittukkut Siumup siulittaasuannit Kim Kielsenimit tusagassiutitigut nalunaarummi tusagassiortut kajumissaarpai Folketingimut qinersineq torersumik pimoorussisumillu tusagassiiffigisaqqullugu. Sermitsiaq.AG-mi Siumup saqqummiussaa ”Ineqi Aleqamik isornartorsiuisoq” tamanna malinngilaa. Qineqqusaarnermi matumani tunngavissaqanngitsumik pisuutitsiniarnerit nikassaasumillu oqaaseqartarnerit tunngavigalugit oqallinneq qimatsigu. Pisuuteqattaalluni imminnut marrarmik milluunnerit qineqqusaarnermi pisussaannartut akuerineqassanngillat. Tamakku qinersisartut qatsuppaat. Paarlattuanik Folketingimi kalaallit iliuusissaat pillugit takorluukkasi tusartigit.