Torben M.: Takornariartitsisartut ajornartorsiornermik qaangiinavianngillat

Ikiorsiissutit iluaqutaapput, takornariartitsisartulli coronamut tunngatillugu killilersuinerit sakkukillineqanngippata suut tamaasa annaasinnaavaat, Aningaasaqarnermut Siunnersuisoqatigiit siulittaasuat naliliivoq.

Torben Andersen, Økonomisk Råd

Politikkerit Aningaasaqarnermut Siunnersuisoqatigiit siulittaasuannit Torben M. Andersenimit nersualaarneqajuillutik nersualaarneqarput. Ilisimaneqaatiginerungaluarpaa, Kalaallit Nunaata aningaasaqarneranik aaqqissuusseqqinnissap piariaqartinneranik eqqaasitsiuarnini.

Aningaasaqarnermulli professorip ikiorsiissutissat nunami maani suliffeqarfiit ajornartorsiornerannik aniguisinniarlugit atuutsinneqalersut pillugit nersualaarinnippoq:

- Iliuuserisimasaq eqqortuuvoq. Ikiorsiissutini immikkuualuttut oqallisigineqarsinnaangaluarput, assersuutigalugu aningaasat tunniunneqartussat ilaat eqqortuunersut oqallisigineqarsinnaagaluarpoq, taamatulli ikiorsiissuteqarniarneq tunngavilersorluagaavoq. Ikiorsiissuteqartoqarsimanngippat suliffissaaleqisut amerlinerannik kinguneqartumik aningaasaqarneq ajortumik ingerlalersimassagaluarpoq, Torben M. Andersen, aningaasaqarnermi professori aamma Aningaasaqarnermut Siunnersuisoqatigiinni siulittaasoq oqarpoq.

Akunnittarfiit, neriniartarfiit assartuisartullu eqqugaanerpaasut

Taassuma erseqqissaatigaa, ajornartorsiornerup malitsigisaanik Kalaallit Nunaanni suliffissaaleqisut qularnanngitsumik amerlissasut, ikiorsiissutilli suliffeqaannarnissamut ikiuutaassasut.

Torben M. Andersen isumaqarpoq, Kalaallit Nunaata aningaasaqarnerata suliffeqarfiillu fem aamma ti procentiisa akornaanniittut maannakkorpiaq matusisimanermit toqqaannartumik sunnerneqarsimasut:

- Akunnittarfiit, neriniartarfiit assartuisartullu eqqugaanerpaapput, taakkulu Kalaallit Nunaanni aningaasaqarnerup 10 procentiisut annertutigipput, Torben M. Andersen nassuiaavoq.

Kalaallit Nunaat nunarpassuit allat assigalugit aningaasaqarnikkut ajortumik inissisimanngilaq, Danmarkimit ataatsimoortumik tapiissutisisarnermit aalajangersimasunik isertitaqartarami, imatullu annertuunik akiitsoqarani, Aningaasaqarnermulli Siunnersuisoqatigiinni siulittaasup pingaartumik takornariartitsisartut ernumagai:

Nalinginnaasumik ingerlasoqaqqilernissaanut piffissaq sivisussaaq

- Timmisartoqarfiliorniarnermut takornariartitsisarneq tunngaviuvoq. Taamaammat takornariartitsisartut ajonartorsiummik qaangiilluarnissaat pingaaruteqarpoq, tamannalu ajornaatsuinnaanngilaq, aasakkummi takornariaqarnerpaaffiusartumi pisussatut pilersaarutaasimasut tamarmik ajutoorsinnaapput, Torben M. Andersen oqarpoq.

Taassuma oqaatigaa, takornariartitsisartut aallarteqqissappata, nunarsuarmiut coronap tuniluunnneranik aqutsisinnaalernissaat apeqqutaasoq.:

- Killilersuinerit sakkukillineqaraluarpataluunniit inuit sulinngiffeqarlutik angalaqqilernissaanut piffissaq sivisooq ingerlasinnaavoq, assersuutigalugu allamik tuniluuttoqalersinnaaneranik annilaangassuteqarneq pissutigalugu. Takornariartitsisarnerup iluamik ingerlaqqilernissaanut piffissaq sivisooq ingerlaqqaassajunnarsivoq, Torben M. Andersen oqarpoq.

Powered by Labrador CMS