Toqutsisutut pasisap aqqanilinnik ukiulik ilisarisimanngilaa

Niviarsiaraq aqqanilinnik ukiulik, Aasianni toqutaasimasoq nassaarineqartoq, toqutsisutullu pasineqartoq siornatigut imminnut ilisarisimanngillat. Suliat taama ittut nalinginnaasuunngillat, politiit ilisimatitsipput. Pasisap toqutsisimanini nassuerutigisimavaa.

Aasianni niviarsiaqqamik aqqanilinnik ukiulimmik novemberimi toqutsisimasutut pasisap, toqutsinnginnermini niviarsiaraq ilisarisimasimanngilaa.

Suliami paasiniaasut aqutsisuat, Simon Andrés Sermitsiaq.AG-mut taama ilisimatitsivoq.

- Suliaq imminut ilisarisimanngitsut akornanni toqutsinermut tunngassuteqarpoq. Tamanna isumaqarpoq niviarsiaraq pasisarlu imminnut ilisarisimanngitsut. Nunatsinni taamaattoqarnera nalinginnaanngilaq, Simon Andrés nassuiaavoq.

Kalaallit Nunaanni toqutsisoqarsimatillugu nalinginnaaneruvoq toqutaasoq toqutsisorlu imminnut ilisarisimasarnerat.

Niviarsiaraq aqqanilinnik ukiulik novemberip 27-ani 2020 toqungasoq nassaarineqarpoq.

Toqutsineq nassuerutigaa

Angut 27-nik ukiulik tigummigallarneqarpoq. Angut pasisatut inissisimavoq, eqqarsartaatsimigullu misissorneqarnissaminut utaqqilluni.

- Pasisap toqutsisimanini nassuerutigereerpaa, paasiniaasartut aqutsisuat Sermitsiaq.AG-mut oqarpoq.

- Paasiniaanermi suliaq ingerlalluarpoq. Suliami aalajangiisussatut pingaaruteqartut inissereerput. Suliami qulanngilluinnarpugut, oqarpoq.

Eqqarsartaatsimigut misissorneqassaaq

Pasisap toqutsineq nassuerutigereeraluaraa, suliami paasiniagassat suli arlaqarput. Pasisaq eqqarsartaatsimigut misissorneqassaaq.

Eqqarsartaatsikkut misissorneqarneq qaammatini arlalinni ingerlanneqartartoq, paasiniaasut aqutsisuat ilisimatitsivoq. Suliami uppernarsaataasinnaasut arlallit Danmarkimut aamma nassiunneqarsimapput. Taakku National Kriminelteknisk Centerimi misissorneqarput.

Powered by Labrador CMS